Noticias

O Goberno de Carmela Silva garante con máis de 2,2 millóns de euros os servizos sociais comunitarios nos concellos da provincia

52 concellos de menos de 20.000 habitantes recibirán financiación grazas ao Plan de Cofinanciamento, que este ano incrementa as axudas nun total de 30.000 euros


22 novembro 2019
Carmela Silva

A Xunta de Goberno da Deputación de Pontevedra acaba de adxudicar un total de 2.216.662,85 euros aos 52 concellos da provincia de menos de 20.000 habitantes ao abeiro do Plan de cofinanciamento dos servizos sociais comunitarios municipais, o que supón un incremento de preto de 30.000 euros con respecto ao 2018.

A presidenta da Deputación, Carmela Silva, explicou que este ano a institución provincial aumenta a financiación deste Plan en dous aspectos. En concreto, "máis recursos para garantir o servizo de axuda no fogar de acordo ao Decreto que os regula", nos concellos de Baiona, Cambados, Gondomar, Moaña, Poio, O Porriño, Salceda de Caselas, Soutomaior, Tui e Vilaboa. E, por outra banda, "tamén se reforza o financiamento dos 15 concellos que presentan os índices de envellecemento máis elevado". Neste caso os concellos son Agolada, Campo Lameiro, A Cañiza, Cerdedo-Cotobade, Covelo, Crecente, Cuntis, Dozón, Forcarei, Fornelos de Montes, A Lama, Mondariz, As Neves, Rodeiro e Vila de Cruces.

Silva destacou que "preto dun millón de euros serán para o módulo de persoal para os servizos sociais comunitarios básicos dos concellos". No caso do Servizo de Axuda no Fogar "adxudicamos 1.226.673,52 euros para atender a persoas maiores con déficits de autonomía e persoas con diversidade funcional, especialmente cando carezan de apoio persoal, e tamén dá unha resposta preventiva, educativa e socializadora á familias en risco de exclusión social". O perfil das persoas usuarias deste servizo é, principalmente, unha muller, maior de 70 anos, coas limitacións propias da idade e que precisa apoio para realizar algunha das tarefas e actividades da vida diaria.

Máis polo miúdo, o Plan de financiamento dos servizos sociais comunitarios municipais busca integrar o conxunto de proxectos e servizos de apoio educativo e psicosocial dirixidos ás familias, co obxectivo de detectar, previr e superar as situacións de dificultade. Especialmente as eventuais situacións de maltrato infantil ou calquera outra desprotección, así como promover procesos de cambio que favorezan un adecuado exercicio das responsabilidades familiares, a mellora da autonomía, da integración e da participación social das familias e unidades de convivencia.

En concreto, co Plan deste ano 2019 a comarca da Paradanta recibirá un total de 132.416,81 euros, que se repartirán entre as vilas de Arbo (17.799,8 €), A Cañiza (48.339,71 €), Covelo (36.387,71 €) e Crecente(29.889,59 €).

O Condado recibirá 162.018,12 euros, que se repartirán entre Mondariz (56.079,21 €), Mondariz-Balneario (22.697,2 €), As Neves (30.718,71 €), e Salvaterra do Miño (52.523 €).

O Baixo Miño, 181.218,28 euros, que se repartirán entre A Guarda (59.866,12 €), Oia (12.020,24 €), O Rosal (27.847,29 €), Tomiño (59.042 €) e Tui(22.442,63 €).

O Val Miñor, 169.338 euros, que se repartirán entre Baiona (51.310 €), Gondomar (55.514 €) e Nigrán (62.514 €).

A comarca de Deza recibirá 226.064,02 euros, que se repartirán entre Agolada (50.633,27 €), Dozón (34.360,69 €), Rodeiro (26.884,53 €), Silleda (60.847,71 €) e Vila de Cruces (53.337,82 €).

Tabeirós-Terra de Montes, 98.621,63 euros, que se repartirán entre Cerdedo-Cotobade (59.534,78 €) e Forcarei (39.086,85 €).

A comarca de Vigo recibe 268.650,68 euros, que se repartirán entre Fornelos de Montes (26.395,61 €), Mos (65.851,24 €), O Porriño (69.571 €), Pazos de Borbén (24.094,05 €), Salceda de Caselas (60.027,14 €) e Soutomaior (22.711,64 €).

O Morrazo recibe 132.737 euros, que se repartirán entre Bueu (51.786 €) e Moaña (80.951 €).

O Salnés recibe 458.776,01 euros, que se repartirán entre Cambados (47.163,5 €), Catoira (21.337 €), O Grove (50.189,79 €), A Illa de Arousa (21.014,5 €), Meaño (55.042 €), Meis (31.224,86 €), Pontecesures (21.666,5 €), Ribadumia (29.296,63 €), Sanxenxo (62.202 €), Valga (36.699,75 €), e Vilanova de Arousa (82.939,48 €).

E, por último, a comarca de Pontevedra recibe 386.822,3 euros, que se repartirán entre Barro (31.591,27 €), Caldas de Reis (50.907 €), Campo Lameiro (23.421,5 €), Cuntis (41.521,21 €), A Lama (33.838,85 €), Moraña (23.577 €), Poio (90.126,33 €), Ponte Caldelas (40.917 €), Portas (29.806,5 €), e Vilaboa (21.115,64 €).

Audios

  • Audio