Noticias

O Goberno de Carmela Silva pon en marcha novas melloras en estradas provinciais de Deza

A Deputación de Pontevedra aprobou dous proxectos por máis de 650.000 euros en estradas dos concellos de Rodeiro e Agolada


23 novembro 2019
Estradas Deza

A Xunta de Goberno da Deputación de Pontevedra aprobou o expediente de contratación para a adxudicación mediante procedemento aberto simplificado de dous proxectos de mellora en varias estradas provincias da comarca de Deza.

Por unha banda, en Agolada a institución provincial levará a cabo a reposición do firme da EP-6302, que une Berredo con Brántega. Esta actuación ten un orzamento de 435.744,95 euros.

Este proxecto actuará en diversos puntos quilométricos, desde o p.q. 0+000 ata o p.q. 0+060 e desde o p.q. 0+100 ata o p.q. 7+065, ao seu paso polo concello de Agolada. Nestes tramos é necesario repoñer o firme para salvagardar a debida prestación do servizo público viario e de mellorar a seguridade viaria.

Pola súa parte, en Rodeiro repoñerase o firme da EP-6204 entre Portela e Antas de Ulla, unha actuación cun orzamento de 222.826,64 euros. Este proxecto servirá para mellorar a estrada desde o p.q. 0+000 ata o p.q. 7+229, tamén co fin de salvagardar a debida prestación do servizo público viario e de mellorar a seguridade viaria.