Noticias

O Goberno de Carmela Silva quere que "a provincia sexa unha referencia na transformación dixital"

O Pazo da Deputación acolleu a conferencia impartida polo CEO Luis Martín, "Transformación dixital: o futuro converteuse en presente", no marco de "Smartpeme"


13 xuño 2018
SmartPeme

A presidenta da Deputación de Pontevedra, Carmela Silva, xunto ao deputado de Innovación e Promoción Económica, Javier Dios, e ao físico e CEO do Grupo Barrabés.biz, Luis Martín, presentou hoxe no Pazo provincial o evento "Transformación dixital: o futuro converteuse en presente", cunha charla impartida por Martín, para dar a coñecer os servizos vencellados ao programa "Smartpeme" e compartir un almorzo de traballo con outras empresas.

Carmela Silva asegurou que se trata dun evento moi importante xa que desde a institución provincial "estamos a traballar para converter á provincia de Pontevedra nun espazo de intelixencia, de coñecemento e de uso das novas tecnoloxías" e tamén apuntou que "queremos que a provincia sexa unha referencia na transformación dixital". Neste senso, a presidenta destacou que o proxecto "Smartpeme" conta "con persoas que son referencia neste mundo e que son fundamentais neste s. XXI" e destacou especialmente ao CEO do Grupo Barrabés.biz, encargado de impartir a charla "Transformación dixital: o futuro converteuse en presente". Ademais, durante a presentación, Silva tamén aproveitou para lembrar a transformación "total e absoluta" que está a experimentar o modelo turístico da provincia, sinalando que "o noso Goberno quere un modelo turístico sostible, desestacionalizado e baseado no enoturismo".

A presidenta rematou facendo referencia á participación das mulleres na área tecnolóxica, "as mulleres temos un reto moi importante, hai un dato que me preocupa e é que nos últimos anos descendeu o número de mulleres que se matriculan en carreiras das áreas tecnolóxicas na Universidade de Vigo", concluíu. O CEO do grupo Barrabés.Biz, Luis Martín, tamén quixo apoiar este reto lanzado pola presidenta insistindo en que "este é un problema serio, algo estamos facendo mal".

Martín encargouse de impartir a conferencia "Transformación dixital: o futuro converteuse en presente", onde transmitiu a súa visión e coñecemento sobre como abordar este novo reto e na que se puxo en valor a importancia da dixitalización e das novas tecnoloxías para a sociedade do presente e do futuro. O CEO de Barrabés.biz destacou que "estamos inmersos nunha terceira revolución humana na que o poder está no dato".

"SmartPeme" conta con sete oficinas de asesoramento en Cambados, Lalín, O Porriño, Ponteareas, Pontevedra, Barro e Vigo. A través delas a Deputación presta un servizo de asesoramento gratuíto sobre as TIC e a mellora da competitividade empresarial a pemes, persoas emprendedoras e persoas autónomas. Ademais, tamén se encarga de dar información e analizar a madurez tecnolóxica e desenvolvemento das empresas, organizar actividades de capacitación tecnolóxica, procurar axudas, e impulsar a formación de novas tecnoloxías.

O proxecto desenvolve este ano novas carteiras de servizos co obxectivo de continuar axudando ás empresas da provincia a ser máis competitivas na contorna económica actual. O programa abre tres novas grandes liñas: o "Centro Provincial de Economía Dixital" (CPED), no viveiro de empresas de Barro, "SmartPeme Impulsa" e "TurisTIC".

A través do Centro Provincial de Economía Dixital as empresas, persoas autónomas e emprendedoras da provincia poderán coñecer as ferramentas, aplicacións e solucións innovadoras máis relevantes da economía dixital. Para iso, o CPED vaise apoiar nas instalacións do FabLab que a Deputación ten instalado no viveiro de Barro, co obxectivo de posicionarse na vangarda da innovación ao servizo das empresas. "SmartPeme Impulsa" abre novas vías de asesoramento en materia de innovación, competitividade e internacionalización unindo, deste xeito, os obxectivos das empresas coas máis novas tecnoloxías, procesos e servizos, e preparando ás empresas locais para competir nos mercados internacionais. Finalmente "TurisTIC" eríxese como o punto de apoio do sector turístico. Este servizo, enmarcado no Plan estratéxico de Rías Baixas, pretende potenciar o sector a través de axudas ás empresas para adaptarse á contorna dixital, cun enfoque específico para cada colectivo. Adicionalmente, contará con iniciativas innovadoras como a creación dunha aceleradora para empresas TIC relacionadas co sector turístico e a creación dun congreso sobre o impacto das novas tecnoloxías.

Vídeos