Noticias

Novos recoñecementos para os programas de dinamización lectora da Biblioteca Municipal do Grove

A Biblioteca volveu a acadar o premio María Moliner e foi situada como referencia na revista "Mi Biblioteca" deste trimestre.


07 febreiro 2019
O Grove
Literatura

A Biblioteca Municipal do Concello do Grove segue sendo un referente no relativo aos seu programas de dinamización lectora. Esta mesma semana foi comunicada a consecución do Premio María Moliner co programa "Eu vou coa miña Biblioteca" posto en marcha durante o 2018. O Premio, dotado con 1.700 euros, recoñece a iniciativa da Biblioteca ao traballar partindo da obra de Raquel Díaz Reguera "Yo voy conmigo" que se centra en atender á diversidade das persoas, concienciando aos máis cativos sobre a aceptación desa diversidade e no importante que é ofrecer servizos e recursos que poidan cubrir as necesidades específicas de cada persoa.

Ademais deste Premio, que se suma aos anteriores conqueridos, a revista especializada "Mi Biblioteca" ven de publicar no número de inverno un artigo sobre a actividade "Atrapados con Alicia", posta en marcha na Biblioteca do Grove durante o mes de setembro. O artigo versa sobre a finalidade e desenvolvemento desta actividade, un escape room literario familiar que acadou un notable éxito entre familias.

Estes novos recoñecementos a nivel nacional supoñen un novo pulo para a actividade e funcionamento da biblioteca grovensa, cuxas actividades se atopan tamén no catálogo de "Boas prácticas bibliotecarias" do Ministerio de Cultura.