Noticias

O Museo rememorará a relación de Lorca con Galicia esta semana con actividades para todas as idades

Unha ruta, contacontos ilustrados e unha conferencia centrarán a programación de "Pontevedra, cidade lorquiana" no Sexto Edificio


21 outubro 2019
Cidade lorquiana

A relación de Federico García Lorca con Galicia e, concretamente, coa cidade do Lérez será o centro da nova proposta cultural que albergará o Museo de Pontevedra ao longo desta semana. Así o confirmou hoxe o seu director, José Manuel Rey, ao detallar a programación de actividades que terán lugar no Sexto Edificio e que inclúe contacontos ilustrados para nenas e nenos, unha conferencia e unha ruta pola vila.

Os integrantes de Polo Correo do Vento serán os encargados de desenvolver a maior parte deste programa, baseado, tal e como explicaron Enrique Mauricio e Carlos Taboada, no feito de que "Lorca chegou a Galicia por primeira vez o 25 de outubro de 1916 e visitou Pontevedra en dúas ocasións. É por isto que, sumándonos ao traballo que fixo Alvarellos Editora neste sentido, celebraremos o Día de Lorca en Galicia cunhas xornadas centradas na relación do poeta coa nosa cultura e coa nosa vila".

Así, a partir de mañá realizaranse visitas escolares ao Museo de Pontevedra, xa concertadas cos centros educativos, que xirarán en torno ao autor dos Seis poemas galegos e nas que, ademais, as e os participantes terán a oportunidade de realizar a súa propia caricatura do poeta granadino.

Pola súa banda, o xoves, ás 19:30 h, o editor Henrique Alvarellos, acompañado polo xornalista Ramón Rozas, ofrecerá a conferencia "Viaxe a García Lorca, poeta galego". "A decisión de García Lorca de escribir en galego e de confesarse ‘poeta galego' converteuno, en vida e ata hoxe, no gran embaixador da cultura e da lingua galegas polo mundo", destacou Alvarellos, ao tempo que engadiu: "No Museo de Pontevedra falarei desta fonda relación e da ofrenda para a nosa lingua e a nosa cultura que constitúen os Seis poemas galegos".

O editor adiantou, ademais, que proxectará no Sexto Edificio un breve documental "moi descoñecido" da xira que a compañía La Barraca realizou por Galicia e Asturias en agosto de 1932.

 "Levo varios anos investigando esta relación, esta empatía de Lorca con nós, e publiquei o resultado da miña investigación ata agora en dous libros, os dous editados por Alvarellos Editora, en 2018: El gran viaje de estudios de García Lorca e a edición facsimilar e ilustrada dos Seis poemas galegos", apuntou.

O sábado, ás 12:00 h, haberá un contacontos ilustrado para o público infantil en torno aos Seis poemas galegos e ás 13:00 h comezará a ruta "Pontevedra, cidade lorquiana", guiada por Enrique Mauricio e Carlos Taboada, que partirá do Sexto Edificio e transcorrerá polo edificio Castro Monteagudo do Museo, a praza da Ferrería, a rúa García Camba e as prazas de Galicia e San Xosé.