Noticias

O polígono de Barro acolle catro novas accións formativas do programa "SmartPeme" da Deputación de Pontevedra

Están dirixidas á adaptación das empresas e proxectos emprendedores da provincia ao novo escenario dixital no que desenvolver as súas actividades


07 novembro 2019
Smartpeme

O polígono de Barro acolle catro novas accións formativas do programa "SmartPeme" da Deputación de Pontevedra para a adaptación das empresas e proxectos emprendedores da provincia ao novo escenario dixital no que desenvolver as súas actividades e aproveitar as ferramentas existentes, co obxectivo de aumentar a súa competitividade. Deste xeito, "SmartPeme" oferta ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións de empresarios e empresarias e de mozos e mozas autónomas.

Así, os cursos que se impartirán desde este venres día 8 ata o 26 de novembro serán os seguintes: Visita á Empresa Filament2Print, que se desenvolverá o venres 8 de novembro de 16 a 17.30 horas; Impresión 3D Orientada á Xoiería, que será o venres 15 de novembro de 10 a 14 horas; Que é o Internet das Cousas (IoT) e que Promete, programado para o xoves 21 de novembro entre as 19 e as 21 horas; e, finalmente, Ciberataques: que son e cales son os seus Riscos, que será o martes 26 de novembro de 19 a 21 horas.

Agás Visita á Empresa Filament2Print, que, pola súa natureza, se desenvolverá na sede da empresa en Nigrán, os obradoiros impartiranse no Viveiro do polígono de Barro (Polígono Industrial de Barro, parcelas A4.5). As inscricións para tomar parte nas accións formativas pódense facer no número de teléfono 886 202 020, no correo electrónico info.smartpeme@depo.es ou na páxina web www.smartpeme.depo.gal.