Noticias

Carmela Silva: "o Polígono de Barro goza dunha magnífica saúde que nos enche de optimismo cara á reactivación económica"

A presidenta e o alcalde de Barro supervisan a actividade empresarial do polígono, "cada vez máis intensa e con novas empresas en marcha", e o "excelente" estado das instalacións


30 xuño 2020
Visita ao polígono de Barro

A colaboración da administración pública e o empuxe do sector privado como receita conxunta para unha mellor e máis rápida saída de crise atopan no Polígono e no Viveiro de Barro un dos escenarios que mellor a exemplifican. A presidenta da Deputación de Pontevedra, Carmela Silva, puido comprobalo hoxe nas instalacións, acompañada do alcalde de Barro, Xosé Manuel Fernández Abraldes, da deputada de Promoción Económica, Ana Mejías, e do deputado de Cooperación, Santos Héctor.

Carmela Silva mostrou a súa satisfacción ante a intensa actividade empresarial no Polígono, no que actualmente tres novas empresas, das 8 que se venderon no último ano, están a desenvolver obras de construción para levantar as súas naves. A presidenta sinalou que "ter empresas asentadas no territorio é a garantía de futuro e nisto temos que traballar e apostar as administracións públicas". Deste xeito, e observando a construción das novas naves industriais, fixo fincapé en que "falamos dun polígono moi ben situado, pegado á autopista –que é o centro da economía de Galicia–, e que en momentos de crise como estes segue a crecer. Estanse a construír novas naves e, polo tanto, economía. Dicir isto no momento que estamos a vivir énchenos de optimismo porque as empresas queren tirar para adiante, e temos que apoialas".

Pola súa banda o alcalde de Barro, Xosé Manuel Fernández, amosou a súa alegría por ver que "despois da situación tan difícil que temos vivido todo segue funcionando: as empresas seguen investindo, creando postos de traballo, e continúan os proxectos industriais ligados ao polígono". Ambos subliñaron o "excelente estado do polígono, que é un valor non só para Barro senón para toda a provincia". De feito, nos últimos tempos fixéronse obras para a reposición do cableado do alumeado, que esta semana se amplían á zona E; rozáronse as parcelas da institución; repuxéronse elementos e a sinalización horizontal; e, a mediados de mes, asinarase a adxudicación do novo aparcadoiro público que fará a Deputación para 110 prazas, 3 delas para persoas con mobilidade reducida.

O Viveiro de Barro

Carmela Silva e Xosé Manuel Fernández tamén visitaron as instalacións do viveiro, que "vai como un tiro e cunha ocupación que só nos dá alegrías: 100% de ocupación das naves, incluso con empresas en lista de agarda, e un 80% das oficinas".  A presidenta e o alcalde visitaron tamén o novidoso DepoFabLab, laboratorio de fabricación dixital, "un exemplo de innovación e tecnoloxía", e mantiveron un encontro co equipo asesor do punto SmartPeme e coa coordinadora da quinta edición do coworking que a Deputación fai coa EOI.

"Estou moi contenta –asegurou Carmela Silva– porque temos moitos e novos proxectos en marcha como o traballo pioneiro que se está a desenvolver no DepoFabLab, ligado á intelixencia artificial e aos robots colaborativos (que son xa o presente), e con formación relacionada con esta tecnoloxía, que é a que neste momento as empresas máis adiantadas empregan". Tamén amosou o seu orgullo polo "éxito" da quinta edición do coworking: "a primeira que fixemos online e que está a funcionar moi ben, con 21 persoas traballando en total". Ao respecto, a presidenta provincial destacou que "as galegas e galegos somos xente dinámica, con formación e con iniciativa, que temos que apoiar".  Pola súa banda, o alcalde de Barro, que agradeceu a estreita e respectuosa colaboración entre concello e Deputación para dinamizar todo o recinto, puxo en valor o importante papel do viveiro, ao que cualificou como "a guinda do polígono", "na formación ás persoas con iniciativa empresarial para poñer en marcha as súas ideas". 

O punto de SmartPeme no Viveiro de Barro tamén disparou as súas cifras coa crise sanitaria que obrigou á actividade telemática. O equipo asesor triplicou o número de asesoramentos a empresas durante o estado de alarma, así como o das persoas que asisten aos obradoiros online.

Fotos