Noticias

O programa da Deputación "Mulleres en acción. Violencia zero" chega este martes a Cuntis da man de Carmen Conde e o seu espectáculo "Tabú"

A artista conxuga teatro, música e narración oral no evento, que terá lugar o martes 29 de outubro, ás 17 horas, no CPI Aurelio Marcelino


28 outubro 2019
Mulleres en Acción. Violencia Zero

Transmitir as historias de confusión, secretismo, amor, picaresca e sexualidade das mulleres que son o alicerce da nosa terra é o obxectivo fundamental que procura a artista Carmen Conde co seu espectáculo Tabú, que chegará este martes 29 de outubro, ás 17 horas, ó CPI Aurelio Marcelino de Cuntis da man do programa "Mulleres en acción. Violencia zero", organizado pola Deputación de Pontevedra.

A acción nace de conversas mantidas con mulleres de entre 70 e 95 anos do Val Miñor, O Morrazo, O Courel, A Mariña, a Costa da Morte e o Couto Mixto sobre a vida erótica e sexual da súa xuventude. O espectáculo articúlase sobre estas vivencias para ofrecer un produto cultural con estrutura de diario íntimo no que se dan cita a paixón, a crueldade e os segredos dunha xeración de mulleres que viviron sometidas baixo a ditadura do tabú.

Carmen Conde é dramaturga, contadora e guionista e conta, ademais, cun currículo capaz de atravesar o Atlántico, con funcións nas dúas beiras do océano. Autora de relatos breves para todos os públicos, pero tamén humorista de comedia unipersonal con espectáculos como Las Muñecas Rusas, Trinidad, El Efecto Kuleshov e Premios Darwin, galardoada co premio á mellor comedia por parte de Hipócrita Teatro, a artista gañou o Slam de Poesía Oral Zona Norte en Bos Aires no ano 2015 e a I Edición do Slam Poetry Compostela no 2018.

"Mulleres en acción. Violencia zero" ten por obxectivo darlle visibilidade á loita contra as violencias machistas, así como dar a coñecer o traballo de novas artistas que están a traballar a prol da igualdade. Este ano volve reunir o traballo de 25 artistas especializadas en diferentes modalidades como son a pintura, a música, a danza, o teatro, a poesía, o graffiti ou a performance, vinculadas todas elas pola vontade de ofrecer na súa obra un firme discurso en favor da igualdade de xénero. Esta cuarta edición comezou en novembro de 2018 e novamente terá lugar en 25 concellos da provincia (Vigo, Pontevedra, Ponteareas, Salceda de Caselas, Vilaboa, Mos, Ponte Caldelas, Cambados, Vilagarcía de Arousa, Barro, Lalín, O Grove, Silleda, Tomiño, Poio, As Neves, A Illa de Arousa, Baiona, Cangas, A Guarda, Forcarei, Gondomar, Cuntis, Meis e Nigrán).