Noticias

O programa da Deputación "Musigal 2019" chega á Guarda e ao Rosal

Andrea Pousa actuará na Guarda este sábado 13 de xullo e Xabier Díaz & Adufeiras de Salitre, no Rosal o mércores 24 de xullo


13 xullo 2019
Musigal

Neste mes de xullo a comarca do Baixo Miño encherase de música grazas a "Musigal 2019", o programa da Deputación de Pontevedra vinculado á área de Cultura. En concreto, Andrea Pousa xunto a súa banda actuará na Guarda esta noite de sábado, actuación enmarcada no XIV Encontro de Embarcacións Tradicionais de Galicia, e Xabier Díaz & Adufeiras de Salitre, no Rosal o mércores 24 de xullo.

Andrea Pousa é unha cantante melódica-lírica nada en Tomiño que xa desde pequena comezou a destacar no mundo da música, de feito aos 15 anos foi seleccionada como unha das voces femininas destacadas de Galicia no Festival da Canción.

Xabier Díaz compaxina as súas facetas de músico e compositor cunha laboriosa actividade como investigador e compilador do folclore tradicional galego. No ano 2015 editou The tambourine man xunto ás "Adufeiras de Salitre", que obtivo o galardón ao mellor disco galego nos Premios de la Música Independiente (2016) e ao mellor álbum na categoría de música tradicional dos Premios Martín Codax da Música (2016).

O programa "Musigal 2019" naceu co obxectivo de favorecer a programación artística por parte dos concellos e diríxese especificamente aos grupos e artistas profesionais de música. Un dos seus obxectivos é a dinamización da lingua galega, en canto que busca favorecer a vivencia positiva no noso idioma e contribuír á posta en valor da lingua galega e ao incremento do seu uso e prestixio, á socialización en galego da infancia e da mocidade e á toma de consciencia sociolingüística da poboación da provincia de Pontevedra. Este 2019 participan no programa da institución provincial máis de 100 grupos e artistas. Esta segunda edición do programa, que conta cun orzamento de 500.000 euros, incrementou notablemente as solicitudes de inscrición con respecto á primeira edición, que había arrancado con 70 inscritos.

Como o ano pasado neste programa existen seis categorías musicais: ‘Son muller', na que poden inscribirse grupos nos que polo menos o 60 % das persoas integrantes e a vocalista sexan mulleres; "Son crianza" para grupos con espectáculos dirixidos ao público infantil e familiar; "Son mocidade" para grupos nos que polo menos o 60 % das persoas integrantes sexan menores de 35 anos; "Son tradición" para grupos de música tradicional galega; "Son clásico" para grupos de música clásica que teñan no seu repertorio composicións de autoras e autores galegos; e "Son actual" para grupos de pop, rock, hip hop e música electrónica.