Noticias

O Sexto Edificio ábrese este sábado a outras disciplinas artísticas para celebrar o Día Internacional dos Museos

Unha intervención de danza, teatro e música marcará a programación, que incluirá visitas guiadas especiais e a ampliación do horario ata medianoite


14 maio 2019
Día Internacional dos Museos

A consagración da primavera é o título da intervención que unha trintena de estudantes da Escola Superior de Arte Dramática de Galicia (ESAD) presentará o sábado no Museo de Pontevedra, unha proposta que pretende amosar un traballo de integración de danza-teatro-música a partir da xa mítica coreografía creada pola bailarina e coreógrafa alemá Pina Bausch no ano 1975 para a Wuppertal Opera Ballet, que máis tarde rebautizaría como o Tanztheater Wuppertal.

Esta iniciativa, prevista para as 19.00 e as 21.30 horas, constitúe un dos actos programados con motivo do Día Internacional dos Museos, e complementarase con visitas guiadas especiais ás coleccións dos edificios Sarmiento e Sexto (ás 11, ás 12, ás 17 e ás 18 horas) sen necesidade de inscrición previa. Ademais, co gaio desa xornada conmemorativa, o Museo de Pontevedra permanecerá aberto ata medianoite.

A proposta da ESAD de Galicia, baseada na coreografía de Pina Baush e adaptada para estudantes de interpretación, achégase aos preceptos da danza-teatro, aínda que respecta as dúas partes nas que se basea a partitura musical e a coreografía: A adoración da terra, que se representará na primeira planta do museo, mentres que O sacrificio escenificarase no hall de entrada ao museo.

A posta en escena de A consagración da primavera é un proxecto de carácter pedagóxico a cargo dos docentes David Mortol Moreno (escenografía) e Ángeles Gayoso Diz (danza para actrices e actores), que integra as especialidades de Interpretación e Escenografía, coa participación tamén dunha alumna de cuarto curso de Dirección Escénica.

A intención é amosar o traballo de Pina Bausch, unha das creadoras máis influentes da escena contemporánea europea do século XX, e que tivo en A consagración da primavera un dos fitos da súa revolucionaria carreira de éxitos internacionais dentro da danza-teatro. A orixe da peza é a composición musical homónima de Ígor Stravinski do ano 1913.