Arrancan as obras de reparación da cuberta e da fachada da Escola de Cantería

A Deputación inviste nesta nova actuación outros 350.000 euros amais de abordar a mellora do sistema de filtrado de aire por máis de 33.000 antes da súa transferencia “nas mellores condicións” á Xunta de Galicia

05/08/2022

A Deputación arrancou hoxe  as obras de reparación da cuberta e da fachada da zona de aulas na Escola de Cantería, que supoñen un novo investimento de preto de 350.000 euros que se suman ás actuacións desenvolvidas xa pola institución provincial nestes últimos anos para garantir que o centro de formación funcione nas mellores condicións, á espera da transferencia da súa titularidade á Xunta tralo protocolo asinado o pasado mes de xullo.

Cos traballos iniciados hoxe, darase solución aos problemas de filtracións no tellado e na fachada que afectan ao confort e funcionalidade do edificio na zona das aulas. Así, a mala execución do tellado orixinal, de panel tipo sándwich, arranxarase coa instalación dunha sobrecuberta, que se colocará sobre a actual, a partir dunha estrutura metálica que garantirá a continuidade estética e solucionará a problemática da entrada de auga. Tamén se substituirá a rede de pluviais e trasladarase o lucernario existente a unha nova posición que garanta a estanquidade. No que respecta á fachada, realizarase un recubrimento illante e térmico que se aplicará sobre o exterior, melloraranse os tubos de ventilación da cámara de aire e renovaranse as baixantes para arranxar a problemática de filtracións de auga.

Estas obras súmanse tamén ás que se iniciarán no vindeiro mes de setembro para a reparación e mantemento do sistema de filtrado de aire do inmoble, que veñen de adxudicarse pola Deputación por máis de 33.000 euros. Hai que lembrar que, dentro da actividade da formación, o alumnado da Escola realiza obras escultóricas que requiren o uso de ferramentas especializadas, que xeran unha gran cantidade de polvo en suspensión polas tarefas de corte da pedra con fío de diamante, cicelado e outros traballos.  Deste xeito, é necesario de xeito periódico revisar, limpar e substituír os elementos filtrantes e reparar os que o precisen, a maiores do mantemento periódico que se realiza. Neste caso realizarase un mantemento preciso que inclúe, entre outras actuacións, o pintado e cambio de pezas.

Amais destas actuacións, a Deputación de Pontevedra xa tivo que investir no 2020 outros 440.000 euros no arranxo dos defectos da execución da Escola de Cantería. Así, solucionáronse os problemas de accesibilidade, garantindo o acceso peonil, dotando ao centro de prazas de aparcamento para persoas con diversidade funcional, adaptando aseos e vestiarios e substituíndo ramplas interiores, varandas e pasamáns para cumprir coa normativa. Amais, e para facer fronte á contaminación acústica, construíronse falsos teitos acústicos e trasdosados illantes entre aulas e, no que respecta á seguridade, realizáronse melloras nas instalacións eléctricas e de protección contra incendios.