Noticias

Os achados de Castrolandín poñen de manifesto que o castro puido ser ata tres veces máis extenso do que se pensaba

Carmela Silva: "Queremos ser a provincia que máis aposte polo patrimonio. Imos seguir colaborando co CSIC porque temos a obriga de recuperar a nosa cultura, historia e patrimonio. Coñecer o pasado dignifica a vida no presente"


21 xuño 2021
Achados en Castrolandín

Castrolandín puido ser ata tres veces máis extenso do que ata o de agora se pensaba. Esta é a principal conclusión que se desprende dos traballos que a Deputación de Pontevedra e o Instituto de Ciencias de Patrimonio (Incipit) levan desenvolvendo ao longo deste ano no xacemento. A presidenta, Carmela Silva, xunto ao director da escavación en Cuntis, Carlos Otero, e o investigador do Incipit e coordinador do proxecto, César Parcero, deron a coñecer os principais achados dos traballos que abren novas liñas de investigación. "Queremos ser a provincia que máis aposte polo patrimonio –destacou Carmela Silva– e imos seguir colaborando co CSIC neste eido, porque as administracións temos a obriga de recuperar a nosa cultura, historia e patrimonio. Coñecer o pasado dignifica a vida no presente".

A presidenta provincial destacou que "Castrolandín sigue a contarnos moitas cousas. Temos un pasado moi relevante que debemos coidar e respectar porque se trata tamén dun elemento fundamental de desenvolvemento económico, xa que hoxe a xente móvese polo mundo buscando experiencias ligadas ao patrimonio". Partindo desta premisa e do convenio que a Deputación ten co Incipit do CSIC para desenvolver un achegamento multidisciplinar a Castrolandín, hoxe presentáronse as primeiras conclusións que deixan, como gran novidade, que o castro puido ser ata tres veces máis extenso do que se pensaba. Este descubrimento introduce para o equipo de investigación novos interrogantes xa que se ten coñecido que dentro do recinto amurallado principal había espazo libre de construcións mentres que as súas ladeiras, empinadas, de difícil acceso e peor defendidas, estaban habitadas. Deste xeito, o director da escavación, Carlos Otero, adiantou que se abre unha nova liña centrada en pescudar a intensidade e as razóns da ocupación destas ladeiras, que poderían ter que ver co proceso de abandono do castro ou coas diferenzas sociais dentro da comunidade.

As construcións escavadas sitúanse nun segundo recinto habitacional de Castrolandín, nun espazo situado fóra do poboado amurallado do castro, nunha ladeira. Desta escavación, tal e como explicou Otero, extraéronse importantes achados como dúas vivendas das que unha, de seis metros de diámetro cunha lareira monumental no centro considerada a máis grande das documentadas no poboado ata o de agora, foi escavada na súa totalidade. Tamén se descubriu un uso tardío desta zona e que a metade norte da cabana arrasouse nun evento aínda por esclarecer. Ademais acháronse pezas, maioritariamente fragmentos de cerámica moi modesta de uso común, elementos para o traballo de tecido (pesas de tear e unha fusaiola) e o remate dunha fíbula.

Xunto á escavación tamén se desenvolveu un estudo por teledetección do castro e o seu contorno a través de drons, combinando as tecnoloxías LIDAR e a fotografía multiespectral. A revisión preliminar destes datos reforzan tamén a idea de que Castrolandín foi ata tres veces máis extenso. O coordinador, César Parcero, resaltou que este feito "despois de 20 anos de traballos no xacemento de Castrolandín, demostra que se pode seguir producindo coñecemento interesante, de que poden aparecer sorpresas e novidades como esta, relevante tamén desde o punto de vista da xestión do sitio arqueolóxico. Agora as persoas visitantes poden recibir unha información diferente da que recibían ata o momento".