Noticias

Os seis centros participantes no programa depoEMPRENDE na FP acollen esta semana charlas de motivación para o alumnado

As e os estudantes introduciranse nos conceptos da cultura emprendedora e abordarán os primeiros pasos para o desenvolvemento dun proxecto empresarial


19 xaneiro 2019
DepoEmprende na FP

Esta próxima semana vanse desenvolver charlas de motivación para o alumnado da provincia dos centros educativos participantes no programa depoEMPRENDE na FP, impulsado pola Deputación de Pontevedra para fomentar o emprendemento na etapa estudantil. Serán en concreto seis os centros educativos da provincia que acollan as xornadas: o IES Terra de Turonio (Gondomar), o IES de Rodeira (Cangas), o CPR San Miguel (Vigo), a Asociación EFA A Cancela (As Neves), o CIFP Carlos Oroza (Pontevedra) e o CFEA Lourizán (Pontevedra). Está previsto que participen máis de 130 estudantes destas seis comunidades educativas da provincia.

As charlas servirán como unha introdución para os contidos que posteriormente se abordarán durante o desenvolvemento do programa. Máis polo miúdo, tratarán a situación do entorno socioeconómico da provincia de Pontevedra, a necesidade de potenciar a cultura emprendedora na etapa estudantil, as competencias emprendedoras como clave do desenvolvemento persoal e profesional e a fixación dos pasos básicos para a posta en marcha dun proxecto empresarial.

No IES Terra de Turonio, a charla será este luns, ás 17:00 horas. O martes desenvolveranse as charlas no IES de Rodeira, ás 10:30 horas; no CPR San Miguel, ás 12:30 horas; e na Asociación EFA A Cancela, ás 16:30 horas. O mércores terán lugar as charlas no CIFP Carlos Oroza, ás 10:30 horas, e no CFEA Lourizán, ás 12:30 horas.

DepoEMPRENDE na FP é unha das tres categorías na que se divide o programa depoEMPRENDE para escolares, impulsado dende fai tres anos pola Deputación de Pontevedra. As outras dúas categorías son depoEMPRENDE na Escola para alumnado de primaria e educación especial e depoEMPRENDE na ESO para alumnado de secundaria. En total, nas tres iniciativas participan este curso un total de 22 centros educativos, pertencentes a 14 concellos da provincia. Ao longo da semana pasada comezou a fase formativa para preto de 60 profesoras e profesores dos centros participantes, co obxectivo de dotalos das ferramentas e recursos necesarios para axudar ao alumnado a adquirir as competencias emprendedoras.

Na edición deste ano de depoEMPRENDE para escolares participan 9 centros educativos de primaria e especial, 7 da ESO e 6 de formación profesional. O alumnado total que forma parte este ano da iniciativa é de máis de 550 alumnos, e pola banda do persoal docente, están implicados preto de 60 profesoras e profesores. Na categoría de primaria e especial, o obxectivo do programa é crear e xestionar unha cooperativa para fabricar un produto concreto e na fase da ESO a finalidade é crear cooperativas de comercio exterior ao tempo que estudar iniciativa emprendedora. En depoEMPRENDE na FP, o cometido final xa é crear proxectos empresariais concretos. De aí que se comece por estas charlas motivacionais para introducir os primeiros conceptos de cultura emprendedora. O ano pasado, a través deste programa dirixido ás e aos estudantes da FP, téñense configurado 38 proxectos empresariais.