Noticias

157 participantes desfrutaron da VI edición da BTTROITA

O primeiro participante en cruzar a liña de meta conseguiu facer a BTTROITA en menos de dúas horas e media, chegando á meta ás 18:20


26 outubro 2019
Ponte Caldelas
BTTroita

O Concello de Ponte Caldelas e a empresa Global DxT organizaron nesta xornada a VI edición da BTTROITA. O alcalde lembrou hoxe que "parece que se quería resistir esta proba, pero finalmente puidemos con ela", facendo referencia a que este ano tívose que cambiar a proba en dúas ocasións, a primeira (13 de outubro) pola alerta amarela decretada por AEMET. E segunda (27 de outubro) porque coincidía co segundo día de caza menor. Ambas datas foron cambiadas para a seguridade dos participantes.

O primeiro participante en cruzar a liña de meta fixoo ás 18:20 conseguindo facer o percorrido de 38 quilómetros en menos de dúas horas e media.

Finalmente esta proba contou coa participación de 157 ciclistas que puideron desfrutar desta BTTROITA. O alcalde lembrou que se trata "dunha proba de referencia a nivel galego dentro do ciclismo de montaña ou mountain bike".

A gran novidade deste ano é que a proba contou con dúas rutas, unha longa, a BTTTroita Plus de 47 quilómetros e outra máis curta, a BTTroita de 38 quilómetros. Os participantes puideron decidir durante a proba, é dicir "en ruta", que percorrido facer, xa que cando chegaron á Cruz do Brasil os voluntarios indicáronlles o camiño a seguir para facer a proba curta ou a longa. No caso de facer a proba máis curta seguiron o percorrido establecido, e os que preferiron facer a BTTroita Plus fixeron 9 quilómetros por monte e continuaron co mesmo percorrido. Dende a organización xa adiantaron que a proba longa "é moito máis divertida".

O percorrido tivo como punto de saída e de chegada á Praza de España de Ponte Caldelas e incluíu o paso polos montes de Cuñas, Paradela, Parada, O Verdugo, Cristo Rei, Baltar, Chan do Casal e regreso pola zona do río.

A proba contou con dúas zonas con avituallamentos en ruta e unha ampla "fun zone" na Alameda para acoller aos "bikers" ao remate da proba.

A entrega de premios comezou ás 20:00 na Alameda. E os galardóns foron destinados ao participante máis veterano que foi Enrique Castiñeiras con 68 anos, ao participante máis novo que foi Antón Peón con 16 anos e ao equipo máis numeroso que foi Rachacuentas con 12 participantes.  

Dende o Goberno Local apostan por seguir reforzando esta proba, que conta xa cun ben gañado prestixio e goza dun oco propio no calendario dos afeccionados á bicicleta de montaña. Unha cita que para o vindeiro ano tentarán que "volva a súa data inicial, que é o mes de maio". Ademais Andrés Díaz deixou patente a súa aposta por este deporte, xa que Ponte Caldelas foi o primeiro concello que amosou o seu apoio e formará parte dunha nova edición da Epic Race. Unha cita que se celebrará os días 29,30 e 31 de maio do 2020, a chegada a Ponte Caldelas será o día 30, coincidindo coa celebración da Festa da Troita co cal "o bo ambiente estará asegurado".