Noticias

Preto de 600 persoas participan durante esta fin de semana nas excursións do programa da Deputación "En ruta coa Depo" 2019

Veciñas e veciños de Redondela, Silleda, Pontevedra, O Porriño, A Estrada, A Guarda, Cerdedo-Cotobade e Lalín percorrerán recursos turísticos da provincia


10 maio 2019
En ruta coa Depo

O programa "En ruta coa Depo" 2019 organiza esta fin de semana 11 novas excursións nas que participarán preto de 600 persoas de oito concellos da provincia. En concreto serán 589 veciñas e veciños dos concellos de Redondela, Silleda, Pontevedra, O Porriño, A Estrada, A Guarda, Cerdedo-Cotobade e Lalín.

Máis polo miúdo, 54 persoas do ANPA Bolboreta do CEIP Cabanas (Pontevedra), outras 54 persoas da Asociación de Mulleres Rurais Fervenza do Castelo (Silleda), 54 integrantes máis da Asociación Socio-Cultural de Veciños e Amigos de Caroi (Cerdedo-Cotobade) e 54 persoas da Asociación de Mulleres en Igualdade de Vilanova (Lalín) visitarán a Illa de Ons e a localidade mariñeira de Portonovo. Tamén, 54 persoas da Asociación de Veciños e Veciñas da parroquia de Laro (Silleda) e 50 integrantes da Asociación Veciñal Cultural Vila da Guarda (A Guarda) coñecerán as Illas Cíes e o barrio mariñeiro do Berbés en Vigo. Pola súa banda, 54 persoas da Asociación de Mulleres progresistas de Darbo (Pontevedra) e 54 integrantes da Asociación Cultural de Pontellas (O Porriño) percorrerán Cambados, Cidade Europea do Viño: así, visitarán o conxunto histórico, o Museo Etnográfico e do Viño, as ruínas de Santa Mariña Dozo, a adega do pazo de Fefiñáns (con degustación) e o Museo Muíño de Mareas da Seca. Ademais, 54 persoas da Asociación Cultural Deportiva Cidadelle (Redondela) visitarán Meis: o mosteiro da Armenteira, Ruta da Pedra e da Auga, muíños do Batán, monte do Castro e pazo de Señoráns. Por outra banda, 54 integrantes da Asociación Social e Cultural Vaivén (Pontevedra) coñecerán o castelo de Sobroso en Mondariz e o castro de Troña en Ponteareas. Finalmente, 53 persoas da Asociación de Veciños e Veciñas de Santa Eulalia de Matalobos (A Estrada) farán o seu percorrido pola illa de San Simón, castelo de Soutomaior, Ponte Sampaio e o Museo Meirande de Redondela.

O programa "En ruta coa Depo" 2019 oferta este ano 20.000 prazas e 32 rutas para gozar dun día de convivencia, con xantar e transporte incluídos, por lugares emblemáticos da provincia. En liñas xerais, a través desta iniciativa a Deputación pretende crear espazos de unión e convivencia a través do impulso da igualdade de acceso aos recursos turísticos, especialmente para as persoas con diversidade funcional. Tamén dar a coñecer os distintos lugares da provincia de Pontevedra, dotar ás asociacións de recursos para promover o envellecemento activo, así como promover os recursos máis importantes das Rías Baixas para que a xente os coñeza, se poida sentir orgullosa deles, coide o medio ambiente e adquira novos valores de respecto ao entorno.