Noticias

"Vento nas velas" chega ao Concello do Grove da man da Deputación de Pontevedra

A mostra de Xurxo Lobato, que estará instalada en Punta Moreiras, inaugúrase este mércores e permanecerá neste enclave ata o 13 de outubro


03 setembro 2019
Vento nas velas

A Deputación de Pontevedra leva ao concello do Grove a exposición "Vento nas velas" do fotoxornalista Xurxo Lobato. A mostra, concibida para exporse ao aire libre, inaugurarase este mércores 4 de setembro ás 19 horas, coa asistencia da deputada provincial Noemí Outeda, no enclave de Punta Moreiras, onde permanecerá instalada ata o 13 de outubro.

A exposición "Vento nas velas", ideada e creada por Lobato, recolle imaxes que pretenden achegarlle ao público a cultura marítima da provincia de Pontevedra co fin de poñer en valor esta área do patrimonio galego. Esta mostra ten carácter didáctico e disponse en cinco estruturas cúbicas con textos e fotografías do libro do mesmo título publicado no 2017 polo autor e que xurdiu da vocación de difundir a cultura marítima galega e a singularidade das súas embarcacións.

As protagonistas do libro son as embarcacións tradicionais galegas, entre elas as dornas, gamelas, galeóns, botes, traíñas ou bucetas, e o volume inclúe máis de 200 fotografías de barcos en navegación, carpinterías de ribeira, museos do mar, faros, muíños de mar, igrexas de estilo gótico mariñeiro e vilas mariñeiras acompañadas dunha ficha de cada unha das tipoloxías das embarcacións.

Xurxo Lobato (A Coruña, 1956) é un dos profesionais gráficos máis prestixiosos de España. Gañador do premio Ortega y Gasset por unha fotografía do Prestige, pertence á Real Academia Galega de Belas Artes, na sección de Artes da Imaxe. Ademais das súas colaboracións en diversos medios de comunicación, é autor de varios libros e participou en numerosas exposicións individuais e colectivas en todo o mundo.

Ao longo deste ano, a mostra "Vento nas velas" xa percorreu os concellos de Poio, Bueu, A Illa de Arousa, Baiona, A Guarda e Moaña, que foron seleccionados atendendo á relación directa que os contidos da mostra teñen coas súas tradicións mariñeiras e o seu patrimonio.

"Vento nas Velas" continúa a liña iniciada pola Deputación de Pontevedra no 2017 coa exposición "Fasquías. Embarcacións tradicionais", que amosaba maquetas de barcos, coas súas particularidades locais, acompañadas de paneis explicativos.