Dúas integrantes do equipo técnico da Sección de Residuos da Deputación de Pontevedra participaron este xoves, 18 de xuño, en Santiago de Compostela, no grupo de traballo sobre comercio local e hostalaría convocado pola Dirección Xeral de Calidade Ambiental e Sostibilidade da Xunta de Galicia. A súa participación enmarcouse no SEVIC (Servizo de Vixilancia, Inspección e Control), servizo da propia Sección de Residuos.

O encontro, celebrado na Confederación de Empresarios de Galicia, reuniu administracións públicas, sector comercial e hostalaría para identificar boas prácticas, analizar problemáticas comúns e avanzar en medidas que favorezan a economía circular. Nunha mesa de traballo conxunta abordáronse cuestións como a prevención de residuos, a separación en orixe, a mellora da información aos establecementos e a coordinación entre administracións, empresas concesionarias e establecementos. Participaron tamén dúas persoas da Oficina de Economía Circular Municipal, xunto a representantes doutras administracións e entidades do ámbito comercial, hostaleiro e da artesanía.

A achega do SEVIC permitiu trasladar a experiencia no traballo directo cos concellos e cos produtores de residuos da provincia, especialmente na separación en orixe, a recollida diferenciada das fraccións e a detección de dificultades prácticas na xestión. Desde a Sección de Residuos  valorouse positivamente este tipo de espazos, que axudan a mellorar os resultados de separación, reducir impropios e impulsar a prevención.