O presidente da Deputación de Pontevedra, Luis López, enxalza o valor do movemento veciñal como elemento vertebrador e integrador da provincia nun encontro en Vilagarcía coas integrantes da Asociación de Mulleres Rurais e Consumidoras de Trabanca Sardiñeira. Acompañado polo deputado de Acción Comunitaria, Javier Touris, o mandatario provincial coñeceu os proxectos que este colectivo ten en marcha e comprobou o bo resultado que están a dar os programas de apoio ao movemento veciñal postos en marcha polo goberno provincial como o Plan Provincia Comunitaria, polo que esta entidade recibiu 7.500€ que permitiron ampliar os equipamentos do seu local social.

O Plan Provincia Comunitaria é un programa pioneiro impulsado polo goberno provincial para recuperar o apoio e a colaboración co movemento veciñal da provincia. Despois da excelente acollida que tivo a primeira edición, o executivo de Luis López reforza este ano a súa aposta por este plan elevando en 150.000 o orzamento, que se sitúa en 1,15M€ para repartir entre asociacións de veciños ou de mulleres rurais de toda a provincia. Un programa que reparte entre estas entidades entre 6.000 e 10.000 euros co obxectivo de favorecer a reforma das súas sedes, impulsar a organización de actividades ou mellorar os seus equipamentos.

No caso da Asociación de Mulleres rurais e Consumidoras de Trabanca Sardiñeira, a subvención de 7.550e recibida serviu para a adquisición de quince mesas, un carro de transporte, dous armarios e oito estanterías que potencian as posibilidades de organización de actividades no local social que o colectivo ten na praza de Los Ángeles, en Vilagarcía.

A colaboración da Deputación co tecido asociativo da provincia non se limita unicamente ao Plan Provincia Comunitaria, a través do departamento que dirixe o deputado Javier Tourís, están en marcha iniciativas como o Plan +Aqua, de apoio ás comunidades de usuarios de Auga; a Oficina de Transformación Comunitaria, para buscar unha maior eficiencia na produción e consumo enerxético; ou o programa +Convivir, unha proposta de ocio para desfrutar en comunidade.

Galerias de imagenes