#SEDEDEVIGO
Sede de Vigo da Deputación de Pontevedra
Un espazo para a cidadanía
"A nova sede ten un enorme potencial que transforma por completo a nosa presenza en Vigo e por iso queremos convertela nun marabilloso espazo para a cidadanía", resumía a presidenta da Deputación de Pontevedra, Carmela Silva, o día en que se anunciou o acordo de cesión do edificio por parte do Concello de Vigo.
Coa súa presenza na rúa de Eduardo Chao, a Deputación de Pontevedra quere contribuír á recuperación definitiva do centro histórico da cidade e a potenciar a programación cultural de Vigo, dando cabida no inmoble a todo tipo de expresións artísticas e a actividades realizadas en colaboración co tecido asociativo, o sector empresarial, a comunidade universitaria ou colectivos que traballan para garantir os dereitos sociais.
SALAS AO DISPOR DA CIDADANÍA
SALA DE PRENSA SUSANA RODRÍGUEZ GACIO
SALA DE EXPOSICIÓNS MARUJA MALLO
SALA DE I+D+I ÁNGELES ALVARIÑO
AULA MULTIUSOS ROSARIO HERNÁNDEZ DIÉGUEZ
ZONA DE PROXECCIÓNS DOROTEA BÁRCENA
SALA PRINCIPAL ROSALÍA DE CASTRO
SALA DE PRENSA SUSANA RODRÍGUEZ GACIO
A sala de prensa vinculada á actualidade informativa dedicóuselle á paratriatleta viguesa Susana Rodríguez Gacio, referente actual do deporte galego e nacional, que participou nos Xogos Paralímpicos de Rio de Janeiro en 2016 e que agora mesmo se está preparando para Tokio 2020. Foi beneficiaria dunha bolsa Depo-Dan da Deputación de Pontevedra para deportistas de alto rendemento e é tamén un referente fóra das pistas, xa que se converteu na primeira afiliada da ONCE en Galicia, e unha das primeiras de España, en estudar Medicina. É todo un exemplo de superación.
SALA DE EXPOSICIÓNS MARUJA MALLO
A pintora surrealista daralle nome ao espazo de exposicións da nova sede de Vigo da Deputación. Unha muller libre, independente e adiantada ao seu tempo que rompeu con todas as barreiras e desigualdades do sector ata situarse como unha das figuras máis representativas da xeración do 27 e un dos grandes expoñentes internacionais do surrealismo figurativo. Abriulles camiño a moitas artistas posteriores e quíxose recuperar o seu papel como pioneira e impulsora da arte galega no mundo.
SALA DE I+D+I ÁNGELES ALVARIÑO
Este espazo dedicado á formación honrará a figura da primeira oceanógrafa galega, Ángeles Alvariño, experta en zooplancton que descubriu 22 novas especies. Neste caso quíxose homenaxear unha pioneira do mundo da ciencia e unha muller de carácter loitador que grazas ao seu incansable traballo se converteu nunha das máis prestixiosas investigadoras mariñas mundiais do século XX. Co seu exemplo quérese inspirar ás mozas da provincia de Pontevedra para que elixan disciplinas STEM.
AULA MULTIUSOS ROSARIO HERNÁNDEZ DIÉGUEZ
A memoria xoga outro papel importante nos nomes elixidos para os espazos da sede. A Deputación dedícalle a aula multiusos á moza viguesa coñecida como a Calesa, que gañaba a vida vendendo periódicos na rúa do Príncipe e foi asasinada polos fascistas en 1936. Matárona para tentar silenciar a voz de todas as mulleres rebeldes, comprometidas e solidarias desta difícil etapa, e agora a institución provincial volve nomeala para que a súa historia non caia no esquecemento.
ZONA DE PROXECCIÓNS DOROTEA BÁRCENA
De novo a elixida é unha figura contemporánea, unha muller comprometida coas loitas sociais e que sempre traballou a favor dos dereitos das mulleres. Actriz, dramaturga, directora de escena e activista feminista, Dorotea Bárcena foi tamén a primeira muller en dirixir o Centro Dramático Galego. En 1964 formou parte do primeiro grupo de catro mestras que daban clase nos Xesuítas de Vigo, rompendo coa tradición de que só os homes exercían a docencia. Axudou a organizar as tres primeiras edicións das Xornadas de Teatro de Vigo e dedicoulles os seus últimos anos ao audiovisual, converténdose nun dos rostros máis populares da televisión galega.
SALA PRINCIPAL ROSALÍA DE CASTRO
É o espazo principal da planta baixa. Ten unha superficie sobre plano de 195 m2 e está pensada para acoller exposicións da propia Deputación de Pontevedra e darlles cabida a mostras e eventos organizados por outras entidades. A elección do nome da escritora que botou luz sobre as letras galegas xustifícase soa, pero ten ademais que ver coa proximidade física da nova sede da Deputación de Pontevedra en Vigo ao número 12 da Rúa Real, onde estaba a imprenta que editou a primeira edición de Cantares gallegos.
SERVIZOS E HORARIOS
Dirección: Rúa Eduardo Chao, 17 36202 Vigo
Teléfono: +34 986 80 41 00
Rexistro e atención á cidadanía: de luns a venres, de 9.00 a 14.00 horas
Procedemento de solicitude de reserva de espazos: www.sede.depo.gal
Oficina do Oral (Xestión tributaria de recadación de recursos locais): de luns a venres, de 9.00 a 14.00 horas
- Horario de inverno: de luns a venres, de 10.00 a 14.30 e de 16.00 a 19.00 horas
- Horario de verán (agosto): de luns a venres, de 9.00 a 14.30 horas
NOTICIAS DA SEDE DE VIGO
A sede da Deputación en Vigo amosa as pezas de dez creadoras latinoamericanas becadas pola Escola Técnica de Xoiería do Atlántico
A mostra “Forxadoras de historias, metal e pedra” reúne unha selección de obras de diferentes estilos realizadas polas artistas con materiais de proximidade e poderá visitarse ata o 7 de novembro na Sala Maruja Mallo
A sede da Deputación en Vigo abre “A viaxe da miña vida”, unha exposición de láminas que reúne a obra de nove artistas da Asociación Down Vigo
A mostra, que poderá verse desde este mércores na Sala Rosalía, apoiase na técnica da pintura ao pastel coa aplicación directa das cores sobre a superficie
A sede da Deputación en Vigo acolle “Cuestión de tempo” a exposición coa que Román Corbato relaciona orde e medida e conecta espazos e tempos
Carmela Silva: “Con esta mostra apostamos pola arte contemporánea máis conceptual e pola investigación artística na procura de impulsar a experimentación e a innovación e democratizar novas linguaxes contemporáneas”
