A Deputación de Pontevedra abre ao público este venres 28 de novembro no Palacete das Mendoza a exposición "Identidade e territorio", de Carlos Cambre. A mostra, protagonizada por fotografías do artista vilagarcián, estará dispoñible ata o 14 de decembro na sala de exposicións da sede de Turismo Rías Baixas.

A exposición configura un escenario sensorial, non narrativo, que reflexiona sobre a transformación do tempo e a memoria a través da paisaxe. Nesta procura do esencial, Carlos Cambre leva o concepto de 'lugar' ao seu estado primario, interpretando a paisaxe desde o punto de vista da pintura romántica, subliñando a inmensidade da natureza e amosando emocións íntimas e persoais a través dela. Cada imaxe amosa a idea dun mundo baleiro e en calma, lonxe das urxencias e do ruído da realidade cotiá. Ao mesmo tempo, a mostra afonda na subxectividade dun estado emocional transitorio, representando o espazo psicolóxico entre o individuo, o lugar e o seu contexto.

Os horarios de visita da mostra "Identidade e territorio" no Palacete das Mendoza serán os seguintes: de luns a venres de 8:00 a 20:00 horas, os sábados de 10:00 a 14:00 horas e de 16:00 a 19:00 horas, e os domingos e festivos de 10:00 a 14:00 horas.