O Pazo Provincial da Deputación iluminarase na tarde e noite deste vindeiro luns 14 de marzo coa cor amarela que identifica a doenza da endometriose, con motivo do Día Mundial desta enfermidade, unha patoloxía crónica que afecta a unha de cada dez mulleres en idade fértil, co que se calcula que en Galicia padécena 60.000 mulleres. A falta dun tratamento idóneo para a mesma e o feito de que tarda en diagnosticarse unha media de oito anos convértena tamén nunha doenza cun marcado nesgo de xénero.

A institución provincial apoia tamén con esta acción ás reivindicacións da asociación querENDO de Mulleres con Endometriose, de ámbito galego e xurdida en 2015. Este colectivo ten como obxectivos contribuír á axuda física, psicolóxica, e educativa de todas as mulleres afectadas de endometriose e das súas familias, independentemente do grao ou estadio da súa doenza, así como desenvolver todas as actividades socio-sanitarias que sexan necesarias para dar a coñecer a doenza, contribuíndo deste xeito a un diagnóstico precoz e evitando na medida do posible o deterioro da súa calidade de vida.

A endometriose é unha doenza inflamatoria estróxeno-dependente de orixe descoñecida que cursa con moita dor e que nos estadios máis avanzados pode acabar sendo incapacitante. Consiste na implantación e crecemento benigno de tecido endometrial fóra do útero e a extensión varía dende escasas lesións ata grandes endometriomas ováricos ou extensos nódulos/fibroses que causan unha severa distorsión da anatomía pélvica. Trátase, como sinalan desde a asociación, nunha das doenzas máis enigmáticas e controvertidas da xinecoloxía, de feito que tarda ata oito anos en diagnosticarse.