Todos os períodos de inscrición comezarán ás 9 horas dos días sinalados en cada mes, momento no que se habilitará un formulario a través do cal se poderán anotar a persoa solicitante e tres (3) acompañantes, é dicir, un máximo de catro (4) persoas por inscrición.

Este formulario pecharase no momento no que se reciban suficientes inscricións tanto para completar as prazas dispoñibles (15 primeiras persoas) coma para a lista de agarda (quen non estea entre as 15 primeiras, pasará a formar parte da lista de agarda), sen que haxa posibilidade de realizar novas inscricións. Ademais, non se aceptarán inscricións por outras vías (correo electrónico ou teléfono).

Non se permiten cambios nin correccións nas solicitudes; é dicir, as persoas que figuran na solicitude son as únicas que están inscritas no programa e as que poderán participar neste, de ser o caso.

Apertura do prazo de inscrición:

• Actividades do mes de xuño: inscrición a partir das 9 h do 27 de maio.
• Actividades do mes de xullo: inscrición a partir das 9 h do 23 de xuño.
• Actividades do mes de agosto: inscrición a partir das 9 h do 20 de xullo.
• Actividades do mes de setembro: inscrición a partir das 9 h do 24 de agosto.

A lista conformarase por rigorosa orde de chegada das inscricións. A semana anterior á realización da ruta, as 15 primeiras persoas recibirán un correo para que confirmen a súa asistencia ou rexeiten a praza coa maior brevidade posible e, en todo caso, antes das 12 horas do luns anterior á realización da ruta. De existir renuncias, enviaráselles o correo de confirmación ás seguintes persoas da lista de agarda, que deberán respectar o mesmo prazo ou, se se envía pasado este, contestar o máis axiña posible e, en todo caso, antes das 12 horas do xoves anterior á realización da ruta.

É obrigatorio contestar aos correos de confirmación de praza, polo que as persoas que non respondan ou non o fagan nos prazos establecidos quedarán automaticamente excluídas da lista e non poderán participar na ruta para a que se lles confirmou a praza nin en ningunha das outras incluídas no programa “+Bosques” durante todo o ano.

Así mesmo, esta mesma penalización aplicaráselles a aquelas persoas que, tras confirmar a asistencia, non se presenten á actividade.

As persoas penalizadas que formen parte dunha nova inscrición, ben como solicitantes ou ben como acompañantes, non se terán en conta á hora de realizar as confirmacións de praza.

• Todas as actividades contempladas no programa “+Bosques” son gratuítas.
• As prazas son nominais, polo que é requisito imprescindible presentar o documento nacional de identidade (DNI) ao comezo de cada actividade.
• As e os titores legais das e dos menores de idade que non dispoñan do DNI deberán presentar un documento acreditativo de pertenza á unidade familiar.
• Se non se presenta o documento de identidade correspondente, non se poderá participar nesa actividade.
• Cada visita terá unha duración aproximada de dúas horas.
• Ofertaranse 15 prazas por visita, xa que os grupos non deben ser moi numerosos, dada a natureza deste tipo de actividades.
• Para cada actividade indicarase un punto de encontro, que só se lles facilitará por correo electrónico ás persoas que finalmente participen na actividade unha vez que estas confirmen a súa asistencia, como moi tarde, o venres anterior á realización da ruta.
• As persoas que xa participaron nunha ruta determinada no 2025 non poderán repetir a mesma no ano 2026.
• Cada persoa só poderá realizar a mesma visita guiada unha vez.
• Non está permitida a participación de persoas que non estean debidamente inscritas e confirmadas no programa “+Bosques”.