A Deputación concede a cinco concellos unha axuda de 125.000 euros para o mantemento dos seus servizos de normalización lingüística municipais

A Xunta de Goberno aprobou as subvencións máximas para os departamentos xa en funcionamento en Valga, Ponteareas, Moaña, A Cañiza e O Porriño

11/05/2023

O servizo de Lingua da Deputación de Pontevedra vén de conceder cinco subvencións para apoiar o mantemento dos Servizos de Normalización Lingüística (SNL) dos concellos da provincia por un total de 124.853,34 euros neste exercicio de 2023. A Xunta de Goberno do Pasado venres aprobou os importes máximos permitidos a cada un dos municipios-unha contía de 25.000 euros ou o 80% do importe solicitado-, para facer fronte ao custe de persoal dos departamentos municipais que xa están en funcionamento.

A Deputación de Pontevedra recibiu peticións e entregou subvención para mantemento por parte dos concellos de Valga (ao que se concederon 25.000 euros, o 74,46% do custe real do departamento), Ponteareas (25.000 euros, o 68,32% do custe), Moaña (25.000 euros, o 44,29% do custe), A Cañiza (25.000 euros, o 75,39% do custe), e O Porriño, (con novo departamento dende 2020 e 24.853 euros, o 80% do custe solicitado).

A principal novidade deste exercicio 2023 é o aumento das contías nun 75% con respecto ao pasado exercicio, que pasaron dos 20.000 aos 35.000 euros para os municipios que impulsasen novas áreas de Lingua, e dos 16.000 aos 25.000 para as entidades que potenciaron os xa existentes.

Esta nova inxección de fondos provinciais para potenciar a lingua galega debeuse, segundo a deputada responsable da área de Lingua, María Ortega, á aposta para que as administracións locais consoliden o uso do galego como principal lingua de traballo e de comunicación coa veciñanza tendo un departamento consolidado ao efecto, así como para incrementar o uso e o prestixio da lingua en todos os ámbitos e sectores do termo municipal e non só no seo da propia Administración.

As funcións dos servizos de normalización lingüística que se acollen a esta convocatoria, tal como se recolle nas bases, son asesorar a Administración municipal na procura do incremento do uso e prestixio da lingua galega; velar polo cumprimento da lexislación lingüística por parte da institución e por garantir os dereitos lingüísticos á cidadanía; fomentar o uso do galego no conxunto da sociedade; propoñer programas dinamizadores e accións concretas que conciencien a sociedade respecto ao uso e prestixio da lingua galega, e a impliquen no proceso normalizador; fomentar o uso do galego no ámbito socioeconómico e, en xeral, en todos os sectores de importancia para a súa repercusión social; planificar, xestionar, coordinar e difundir a realización de cursos de lingua galega, xerais e específicos, tanto para o persoal da administración como para a poboación en xeral ou para os diferentes sectores sociais; ou mellorar a calidade lingüística e comunicativa da administración, entre outras.

Ademais das axudas desta liña os concellos solicitantes poden optar tamén á liña de axudas da Deputación para o fomento de actividades ou programas de dinamización, algo incompatible no anterior mandato.

— 3 Resultados por páxina
Mostrando o intervalo 1 - 3 de 4 resultados.