Poesía, ilustración e música encheron esta tarde o Pazo provincial da Deputación para celebrar o Día de Rosalía, nun acto multidisciplinar, conducido pola actriz Mónica Camaño, que abarrotou o Salón de Plenos e que comezou nos exterior coa plantación simbólica dunha filla da figueira de tempos da autora, un dos rexistros florais máis prezados de Galicia, doada pola Casa-Museo de Rosalía. A presidenta Carmela Silva, o presidente da Fundación, Anxo Angueira, e as deputadas de Lingua e Cultura, María Ortega e Victoria Alonso foron as persoas encargadas de sementar simbolicamente nos xardíns do Pazo un exemplar desta variedade, co que a provincia pasa a custodiar esta árbore monumental e senlleira intimamente ligada “á autora máis representativa das nosas letras”.

Os poemas de  Rosalía “Diredes d´estos versos, y é verdade”, “Xigantescos olmos, mirtos”, “Silencio!” e “Tal com´as nubes/Qu´impele o vento…” na voz do Premio Nacional de Poesía Xove Alba Cid resoaron no Salón de Plenos ao igual que a melodía da arpa en mans de Alba Barreiro, que interpretou os temas de Rodrigo Romaní “Torres no ar” e “Albeida”. De xeito simultáneo, o artista multidisciplinar Marcos Escudero elaborou en directo unha espectacular ilustración en area coa técnica ‘sand painting’. Ademais, a filósofa, ensaísta, profesora e política Carme Adán foi a encargada de ler o manifesto da Asociación de Escritoras e Escritores en Lingua Galega (AELG) deste ano, do que é tamén autora.

A presidenta, Carmela Silva, puxo en valor a Rosalía de Castro, á que dende a Deputación “reivindicamos para enxalzar o seu papel tamén como unha das primeiras referentes do feminismo en Galicia”. Carmela Silva remarcou “o privilexio que temos en Galicia de que unha muller sexa a nosa referente, a nosa matriarca, o noso grande emblema que nos une e identifica” e, por iso, “é fundamental poñela en valor hoxe, pero tamén todos os días do ano”. Indicou que “celebrar a Rosalía é recoñecer o transcendental papel que desenvolveu nunha época nada sinxela, foi unha muller poderosa e valente que ía un século por diante ao loitar contra un tempo que lle quedaba escaso” e puxo en valor o seu “talento formidable, capaz de atrapar en palabras a brétema ou o verde da paisaxe”, e a quen Galicia “está eternamente agradecida polo orgullo que infunde en nós como pobo”.

Manuel Lorenzo, membro da Fundación Rosalía de Castro, agradeceu a Deputación “a inestimable axuda que nos presta” e asegurou que “hoxe é un día moi especial, agora que por fin confirmamos que Rosalía naceu un 23 de febreiro”. Lorenzo reivindicou as multitudes de Rosalía, “a nosa figura referente e a marca de auga que nos representa”, destacando “a súa condición feminina e a súa perspectiva de país e de lingua” e asegurou que “a través dos seus versos toca o máis profundo de nós, a alma das galegas e os galegos.

A deputada de Lingua, María Ortega, lembrou que o pasado día 21 de febreiro foi o Día da Lingua Nai e celebrou que esa data e a do nacemento da autora estean tan próximas. “Para nós Rosalía é como unha nai que nos acubilla no seu seo e nos amosa a valía do galego e do país. É a nosa autora de referencia, a máis universal e a que nos axuda a construír a nosa identidade”, dixo. A deputada destacou o traballo de posta en valor da autora nos actos institucionais novamente da man de dúas entidades, a Fundación Rosalía de Castro (con Anxo Angueira e Manuel Lourenzo Baleirón), e a AELG, coa lectura do manifesto de Carme Adán, “organizacións sempre reivindicativas do carisma de Rosalía, para nós é unha obriga a colaboración con elas”, subliñou. Lembrou tamén  que os actos de Rosalía seguirán o resto do ano coas visitas á casa de Rosalía baixo o programa ‘A súa casiña, o meu lar’ destinado a centros de ensino de Primaria e Secundaria, aos que se sufraga a entrada á Casa da Matanza e o transporte, sendo unha actividade totalmente de balde para as persoas beneficiarias. Recordou tamén a exposición ‘Nasín cando as prantas nasen. O herbario de Rosalía’, que estará no mes de abril no vestíbulo do Pazo. Por último, Ortega deu as grazas e os parabéns ás compañeiras do departamento de Comunicación Institucional por deseñar para a efeméride unha imaxe que amosa “á Rosalía que nos gusta, reivindicativa, forte, que crea pensamento dende a súa obra”.

Pola súa banda, a deputada de Cultura, Victoria Alonso sinalou que “Rosalía de Castro foi unha muller que loitou para abrirse un oco nun mundo no que ás mulleres non se lle cedían espazos”. A deputada puxo en valor o legado de Rosalía, que “nos transcende e nos transcenderá porque nos representa a nós e tamén o moito que queremos a nosa terra ata o punto de que unha e outra, Rosalía e Galicia, converxen e se converten na mesma cousa”. Ademais, tamén agradeceu o alumnado e profesorado participante no concurso ‘A Nosa Rosalía Feminista’ por “sementar as bases para que as nenas e nenos de hoxe sexan homes e mulleres implicadas e implicados na construción dun mundo mellor, un mundo do que Rosalía de Castro estaría moi orgullosa”.

Agasallos para o público e para os centros que participaron no concurso ‘A Nosa Rosalía’

No acto de Pontevedra tamén se entregaron os premios das categorías ‘Campaniñas’ (de 1º a 3º de Primaria) e ‘Paxariños’ (Educación Especial) do concurso escolar ‘A Nosa Rosalía Feminista’, no que a rapazada tivo que elaborar interpretacións feministas de Rosalía, en forma de colaxe, recollendo palabras e versos ou representacións da súa figura a partir da reciclaxe, con papeis, cartóns, telas e obxectos ou elementos tridimensionais. Os centros premiados foron, na categoría de ‘Campaniñas’: o CEIP Mestre Martínez Alonso de Mos (aula de 2º A), que recibiu o 1º premio, e o 2º premio para o CEIP Cruz Budiño do Porriño (aula de 1º), que conseguiu o 2º premio. No caso da categoría ‘Paxariños’ o premio foi parar para o CEE de Vilagarcía de Arousa. Mañá, no acto na cidade de Vigo, daranse a coñecer os resultados da categoría Airiños (4º a 6º Primaria).

Os centros gañadores recibiron un lote de libros (neste caso para todos os centros participantes), un obradoiro creativo de reciclaxe (para a 2ª mellor colaxe de cada categoría) de Vaciocero, e un contacontos sobre Rosalía (para a mellor colaxe) a cargo de Raquel Queizás. No caso dos centros de Educación Especial, ambas as dúas actividades estarán adaptadas ás súas necesidades.

O público asistente ao “Día de Rosalía” organizado pola Deputación en Pontevedra recibiu exemplares da camelia Rosalía de Castro e dos libros “A conversa expansiva” (de Álvarez Cáccamo) e “Dicir unha illa” (do seminario de tradución poética da illa de San Simón), da Colección Cíes da editorial da institución provincial. Ademais, tamén se fixo entrega á Fundación Rosalía de Castro, representantes da AELG, á condutora, artistas e centros premiados no concurso “A Nosa Rosalía”, de azulexos artesáns coa silueta e versos de Rosalía de Castro procedentes dunha serie limitada elaborada por Lucía Ares da firma ‘Coas Mans Artesanía’ (Silleda).

Galerias de imaxes

videos