A vicepresidenta da Deputación de Pontevedra, Luisa Sánchez, desexou ao Club Baloncesto Seis do Nadal unha tempada “chea de retos, aprendizaxe e momentos para o recordo”, durante a presentación dos equipos que a entidade deportiva viguesa celebrou este sábado no pavillón de Navia. A tamén responsable de Deportes da institución provincial puxo en valor a dedicación das familias e da comunidade educativa, que foi fundamental na creación e o desenvolvemento do club durante os seus 42 anos de historia. Do mesmo xeito, eloxiou o traballo da directiva e dos corpos técnicos das diferentes categorías.

Así, Luisa Sánchez dirixiuse a todos os estamentos e animou á rapazada a “gozar do baloncesto e das amizades que formedes co deporte”. “Que compitades con respecto e que sigades levando o nome do Seis do Nadal e de Vigo con orgullo alí onde vaiades”, remachou.