Silleda vai acoller este venres a obra de teatro ‘O Péndulo’ da compañía Inversa Teatro sobre a historia dun home fusilado e a única alcaldesa galega na II República. Trátase dunha representación incluída no ciclo de teatro ‘Barracas’ posto en marcha polo departamento de Memoria Histórica da Deputación que tamén levará á escena obras relacionadas co golpe de Estado do 36, a ditadura e a represión franquista a outras localidades como Vilagarcía, Moaña, Gondomar, Tomiño ou O Grove.

A peza representarase este venres ás 20.30 horas no Auditorio Manuel Dopazo de Bandeira con entrada de balde e sen reserva previa (máis información no 986 58 00 0, no departamento de Cultura). Con esta programación, explica a deputada de Memoria María Ortega, a Deputación pretende dous obxectivos:  garantir que as compañías teatrais do país conten con respaldo económico que as anime a proxectar textos referentes á memoria e espallar entre a cidadanía a memoria con perspectiva de país, xénero e clase.

‘O Péndulo’ é unha obra de teatro-documento que mostra como se desenvolveu a sublevación militar de 1936 e o inicio da Guerra Civil en Galicia. Trátase dun achegamento á historia colectiva desde o persoal xa que Marta Pérez, co-dramaturga e actriz, traslada a experiencia do seu bisavó, Tirso Gómez  Freijido, natural de Ribadavia e residente na Cañiza.

Membro do Partido Socialista, republicano e presidente da Casa do Pobo da vila, Tirso foi apresado e fusilado no ano 1936 no Castro de Vigo, xunto cos seus camaradas Xusto Moure, Jesús Pérez e Antonio Mouteira. Outro veciño da localidade,  Benjamín Malvar, apareceu asasinado nunha gabia. Xunto con eles foi apresada tamén María Gómez, alcaldesa da Cañiza, pertencente a Esquerda Republicana, a única muller que exerceu ese cargo en Galicia durante a Segunda República. Esta última conseguiu salvarse do fusilamento no último momento, alegando un falso embarazo. Foi condenada a cadea perpetua e acabou vivindo en Lugo coa anarquista  Urania Mella.

A propia Marta Pérez destacou que é o “proxecto máis especial do que levo desenvolvido ata agora porque  falo dende a memoria histórica pero tamén dende o persoal. (...) A obra é ‘O péndulo’ porque eu estou constantemente buscando que facer, que dicir, e vendo ata onde podo chegar. Intentarei facela co máximo cariño e respecto, non só pola miña familia, senón polo resto das familias implicadas e coas que teño contacto”.

Ademais de participar como dramaturga e actriz, “debido á carga emocional que supón para min”, Pérez precisou de axuda na coescrita de Ernesto Eis e na dirección Carlos Álvarez Osorio, En escena están tamén Rosa Puga Davila e Nerea Brey.