A Deputación de Pontevedra pon en valor o impulso á internacionalización e desestacionalización do destino Rías Baixas nos tres anos de goberno de Luis López. “Nunca esquecerei o día en que nunha entrega de premios en Cannes o nome da Deputación de Pontevedra se escoitou ao lado de L´Oreal, UEFA ou Porsche e, aínda por riba, falando do interior de Rías Baixas” subliñou o presidente quen remarcou que “o traballo feito está dando uns froitos históricos e por vez primeira este maio recibimos máis visitantes estranxeiros que nacionais”.

Este crecemento, tal e como destacou o deputado de Turismo, Jesús Vázquez Almuíña, sustentouse na estratexia de promoción exterior impulsada pola Deputación nestes tres anos de goberno, que levou a marca Rías Baixas por vez primeira na súa historia a ocupar un espazo propio en feiras profesionais de referencia mundial como as celebradas en Berlín e Londres. Ademais, as campañas promocionais deseñadas pola Deputación para divulgar a provincia están a ser recoñecidas en festivais internacionais de todo o mundo, con galardóns en Xapón, Francia, Sudáfrica ou Estados Unidos, e Cando volves? situouse como a acción promocional de maior éxito de Turismo Rías Baixas, con preto de 70 millóns de impactos para dar a coñecer o potencial turístico do interior da provincia.

O avance na desestacionalización, tal e como subliñou o deputado, vai da man da Rías Baixas Convention Bureau, creada este último ano co obxectivo de impulsar o turismo de congresos, convencións, eventos e reunións; ou de programas de astroturismo como Baixo o Ceo das Rías Baixas, a través do cal se está a traballar para certificar os castelos de Soutomaior e Sobroso co selo Starlight; así como iniciativas como a Rías Baixas Film Commission, que o pasado ano captou máis de 60 rodaxes de películas e series na provincia; e a nova liña subvencións para eventos deportivos de relevancia turística.

Ademais, o deputado Almuíña remarcou que “como é marca deste goberno, estamos a impulsar o turismo tendendo pontes, cun sector turístico recoñecido con 400 distincións de calidade do SICTED e tamén nos I Premios Turismo Rías Baixas que se lanzaron por vez primeira este ano 2026; cos concellos; e a través de iniciativas como a Oficina de Gobernanza Turística que nos está a permitir avanzar cara un modelo de xestión turística máis planificado, innovador e colaborativo”.