Tamén aprenderon que non era un problema individual de cada familia, senón unha lacra social con culpables que se lucraban sen importarlles as vidas que desfacían. En barrios e vilas costeiras, un grupo de nais ergueuse para denunciar publicamente o drama da drogadicción e a impunidade dos capos. Así naceu o movemento Nais Contra a Droga, que lle deu paso á Asociación Érguete, creada nun pequeno local da rúa Uruguai de Vigo en outubro de 1995. Alí iniciaron a loita que cambiaría as súas vidas, as dos seus fillos e, tamén, a sociedade. Sen medo, manifestáronse diante dos bares que vendían droga, presentáronse en xuízos, sinalaron os traficantes e acompañaron as familias das vítimas. A súa acción fixo visible un problema oculto, activou importantes decisións nas institucións e impulsou cambios lexislativos e policiais. Durante décadas, Érguete desenvolveu programas de prevención, reinserción social e apoio ás persoas con adiccións. A valentía destas nais converteuse nun símbolo da resistencia cidadá contra o crime organizado e nun exemplo de mobilización comunitaria que transcendeu fronteiras. Neste 2025 celébrase o 40 aniversario da súa loita conxunta.