A vicepresidenta da Deputación de Pontevedra, Luisa Sánchez, presentou no pazo de Rubiáns o X Torneo Cidade de Vilagarcía, que acollerá esta localidade os vindeiros 28 e 29 de marzo.  “Faime especial ilusión participar neste acto que supón a miña estrea como vicepresidenta provincial e, sobre todo, como deputada delegada da área de Deportes. Así que, desde xa, aproveito esta ocasión para amosar a miña disposición con todos vós, con todos os clubs e entidades e con todos os deportistas da provincia”, remarcou Sánchez.

Para a vicepresidenta, o X Torneo Cidade de Vilagarcía “converte a Vilagarcía na capital do fútbol de formación” e permite que “poidamos gozar dun fútbol de altísima calidade da man dos alevíns, o futuro deste deporte”. Tamén subliñou o feito de que a edición deste ano conte con Claudio Silva como “padriño de luxo” da décima edición do torneo e felicitou o Arosa S. C. polo “traballo e constancia na organización deste torneo” e “por estes case 80 anos apostando polo deporte rei desde a base”.