O presidente da Deputación de Pontevedra, Luis López, anunciou este venres o visto bo Xunta de Goberno provincial á adxudicación das obras na estrada Carballedo-Rebodelo (EP-0403), no concello de Cerdedo Cotobade, por un total de 753.000 euros. O presidente lembrou que a actuación abrangue a totalidade da vía, dunha lonxitude de 2,6 quilómetros, e terá un prazo de execución de seis meses.

Actualmente o sistema de drenaxe e o firme da estrada presentan danos que supoñen riscos para a seguridade viaria, e os traballos proxectados permitirán corrixir estes problemas. A drenaxe mellorarase a través da substitución das cunetas que se atopan en mal estado e da execución de novos tramos naquelas zonas onde na actualidade non existen. Unha vez executada a drenaxe, procederase á reposición dos firmes e á execución dun tramo de barreira de seguridade na marxe dereita. Finalmente, realizarase unha redistribución dos espazos mediante o pintado das liñas e, para separar a calzada da zona peonil, unha dobre liña continua con resaltos e captafaros.

1 millón de euros para as estradas provinciais na Xunta de Goberno

A adxudicación das obras na EP-0403 aprobada na sesión da Xunta de Goberno desta semana súmase á dos traballos que se realizarán na EP-5003 A Caniza-Arbo, en Arbo, cunha inxección de máis dun millón de euros entre as dúas. “Seguimos mobilizando recursos como nunca antes se vira para manter as nosas infraestruturas nas mellores condicións”, sinalou Luis López.

audios