A Deputación de Pontevedra acaba de rematar a execución de cunetas de seguridade e obras de mellora da seguridade viaria na estrada provincial EP-7104 Cerdedo-Santo Domingo ao seu paso por San Miguel de Presqueiras, no Concello de Forcarei. A deputada de Infraestruturas Públicas e Mobilidade, Belén Cachafeiro, recorreu o tramo no que se desenvolveu a actuación ao abeiro do acordo marco de cunetas de seguridade na rede viaria da Deputación, que ascende a preto de 2 millóns de euros.

Segundo destacou Cachafeiro, as obras que se realizaron no Concello de Forcarei  trátanse de operacións de mellora da seguridade viaria mediante a execución de cunetas na estrada provincial EP-7104 Cerdedo-Santo Domingo, nun tramo de 212 metros entre os puntos quilométricos 6+670 e o 7+000, ao seu paso por Riazón, na parroquia de San Miguel de Presqueiras. "Mediante estas cunetas de formigón armado - tal e como recordou a deputada- non só melloramos a drenaxe da estrada mediante a evacuación das augas pluviais, senón que se vai xerar un espazo transitable máis seguro para os peóns". A actuación en Forcarei contemplou a execución de cunetas de seguridade, a colocación de tubaxes para drenaxe, a execución de arquetas e o recrecido de pozos.

Belén Cachafeiro lembrou que esta é só unha das actuacións incluídas no acordo marco de obras de cunetas de seguridade na rede viaria da Deputación de Pontevedra, que ascende a 2 millóns de euros. Ao abeiro deste acordo marco, ademais da estrada provincial EP-7104 ao seu paso de Forcarei, na comarca de Terra de Montes e de Deza tamén se está a actuar en vías de Agolada (EP-6302 Berredo-Brántega e EP-6306 Agolada-Cruces), Cerdedo-Cotobade (EP-7103 Cerdedo-Castro- Quireza), Dozón (EP-6101 Bidueiros-Amedo, EP-6102 Castro-Dozón-O Irixo, EP-6104 O Castro-Dozón-Saa-A Rocha e EP-6107 Diz-Bidueiros-Amedo), A Estrada (EP-7006 O Sol-Pardemarín, EP-7011 A Pena do Foxo-Olives, EP-7016 A Estrada-Vinseiro-As Casetas, EP-7017 Callobre-Ponte Ledesma, EP- 7024 Olives-Sequeros e EP-7025 Arca-Nigoi), Lalín (EP-6005 Prado-Bolaño), Rodeiro (EP-6201 Rodeiro-Vilela e EP-6204 A Portela-Antas de Ulla), Silleda (EP-6504 Negreiros-Carboeiro, EP-6508 A Somoza-Escuadro e EP-6510 Lamela-Moalde-Senra) e Vila de Cruces (EP-6404 Ferreirós-Ollares).