A vicepresidenta da Deputación de Pontevedra, Luisa Sánchez, participou este martes na reunión do Padroado do Parque Nacional das Illas Atlánticas de Galicia na que se formalizou o relevo na súa presidencia. Durante o encontro, a ambientalista Xiana Fernández-Albor Batallán asumiu a responsabilidade á fronte do órgano, en substitución de Fernando Garrido Valenzuela. A representante provincial en Vigo trasladou os seus parabéns á nova presidenta e desexoulle moita sorte nesta nova etapa. A este respecto, sostivo que está “altamente capacitada” para o cargo e confiou en que desenvolverá un excelente labor na defensa dun espazo natural de referencia en España. Ademais, recoñeceu e agradeceu o traballo realizado por Fernando Garrido durante os seus 17 anos de presidencia. Neste sentido, salientou o seu compromiso coa posta en valor do parque nacional.