A entrega tivo lugar no Centro Cultural Marcos Valcárcel de Ourense, onde o deputado entregou en representación da Deputación de Pontevedra o galardón ao mellor videoensaio sobre audiovisual internacional a “Almodóvar roda sobre rodas”, de Juan Ares (de Silleda e alumno da Facultade de Comunicación da Universidade de Vigo), por “aproveitar as posibilidades do medio á hora de identificar recursos narrativos convertidos en trazos autorais, confiando exclusivamente no poder suxestivo da montaxe para construír argumentos puramente audiovisuais, que transcenden a xustaposición para establecer diálogos capaces de xerar novos significados”.

Na súa intervención, Marcos Guisasola destacou que “o noso audiovisual está vivindo os seus mellores tempos” e sinalou o éxito de títulos como ‘O que arde’, ‘As bestas’, ‘O sabor das margaridas’ ou a gañadora da Cuncha de Ouro en San Sebastián ‘O corno’, patrocinada pola Deputación. “Somos unha administración comprometida coa cultura e coa nosa industria audiovisual”, asegurou Guisasola, que lembrou que “fomentar o desenvolvemento do noso tecido cultural é facer país”. O deputado destacou que cantos máis títulos de audiovisual galego haxa dispoñibles “tamén os investigadores terán máis material para tomar como marco de referencia nos seus ensaios”.