A vicepresidenta primeira da Deputación e responsable de Deportes, Marta Fernández-Tapias, participou esta mañá no Concello de Moaña na presentación das probas da Liga ACT de traiñeiras masculina e feminina que se desenvolverán o vindeiro sábado 12 de agosto. Fernández-Tapias salientou a importancia destas competicións, nas que participan os equipos da SD Samertolameu e o SD Tirán feminino, e que unen ás comunidades do norte de España arredor da tradición das traiñeiras, “un dos emblemas por excelencia do deporte das regatas de remo”.

Fernández-Tapias subliñou que estas probas “transcenden o ámbito deportivo e serven como fonte de dinamización turística e económica dos concellos nos que fai escala” e “sitúan a Moaña e á nosa provincia unha vez máis á cabeza da tradición deportiva”. A representante provincial quixo “remar para casa” e animou aos equipos locais que participarán en ambas regatas.

A vicepresidenta primeira subliñou a aposta da Deputación polo deporte “como un dos nosos grandes eixos e obxectivos” neste mandato e apuntou que “como responsable desta área coidarei que se cumpra. Tedes a garantía de que todos os que promovedes o deporte contaredes co noso apoio desde agora e sempre”.