Está dirixido ás persoas maiores ou discapacitadas que vivan soas ou ás persoas que estean acompañadas e teñan as súas facultades moi minguadas para valerse na vida cotiá. Este servizo, vixente desde o ano 1998, lévase a cabo por medio dun convenio de colaboración entre a Deputación de Pontevedra e os concellos da provincia de menos de 20.000 habitantes.

A través dun dispositivo instalado no domicilio, as persoas usuarias poden contactar, só con premer un botón e sen necesidade de empregar as mans, cunha central de atención dispoñible as 24 horas do día, os 365 días do ano. O servizo conta con persoal especificamente preparado para atender e dar resposta ás situacións que se presenten.

Ademais da atención ante situacións de emerxencia, o servizo inclúe o seguimento e acompañamento personalizado mediante chamadas periódicas e sistemas de detección de avisos e alarmas.

Poderanse beneficiar do servizo as persoas que cumpran os requisitos establecidos na ordenanza reguladora do servizo e que residan nun dos concellos da provincia de Pontevedra de menos de 20.000 habitantes que teñan establecido un convenio de colaboración coa Deputación de Pontevedra.