A Deputación de Pontevedra e o Concello da Estrada retomarán proximamente a súa colaboración para volver a poñer en marcha o servizo de asesoramento da Rede Smartpeme neste municipio despois do obrigado parón de dous anos pola pandemia.

Hai que lembrar que esta prestación xurdiu para evitar os desprazamentos das persoas da Estrada ata Lalín, onde se atopa o punto de SmartPeme que atende ás comarcas do Deza e Tabeirós-Terra de Montes, e en resposta á elevada demanda que esta oficina ten de  persoas procedentes da Estrada, que representa un 30,2% do total. Deste xeito, desde o inicio de Smartpeme no 2016 realizáronse 296 asesoramentos a persoas e empresas da Estrada, dos que 113 corresponden ao período entre 2018 e 2020, en que funcionou esta colaboración no propio concello. Tamén neste punto se celebraron 23 obradoiros formativos.

Nesta nova etapa, unha persoa asesora da rede Smartpeme volverá a estar de xeito presencial dúas veces ao mes (baixo cita previa) no espazo cedido polo Concello no viveiro de empresas da Estrada para atender ás empresas, persoas autónomas e pemes que precisen asesoramento personalizado dentro deste programa que ofrece a Deputación de Pontevedra desde o ano 2016 con excelentes resultados na provincia.

Ademais da carteira de formación e asesoramento que vai ofertar o SmartPeme na Estrada ao longo do ano, a través desta colaboración tamén se fai especial fincapé nos servizos específicos para o turismo, debido a que a comarca de Terra de Montes conta con importantes recursos turísticos ligados á cultura e ao patrimonio.