Ante o incremento de consultas telemáticas recibidas no ORAL, o servizo de xestión, inspección e recadación tributaria da Deputación de Pontevedra, a institución provincial acaba de sacar a licitación a subministración dunha ferramenta tipo centro de contacto para a súa xestión. Entre as principais novidades, e co obxectivo de incrementar a calidade na prestación da atención non presencial ás persoas contribuíntes, destaca a introdución de tres novas canles de comunicación coa cidadanía: WhatsApp, SMS e un chat na páxina web da Deputación.

Cun orzamento próximo aos 100.000 euros, o software permitirá mellorar e ampliar as capacidades técnicas da Deputación para prestar este servizo con todas as garantías e facilitar que a cidadanía poida efectuar trámites administrativos de maneira instantánea, para así evitar desprazamentos e esperas.

A ferramenta soportará a integración co sistema de chamadas de voz para a atención (co establecemento de criterios para a súa correcta distribución entre as e os axentes) e solicitude de cita previa. Ademais, permitirá incorporar tres novas modalidades de atención: WhatsApp, SMS e un chat na páxina web da Deputación. Do mesmo xeito, Tamén se habilitará unha función, tanto na web institucional coma no propio servizo telefónico, para solicitar a devolución das chamadas das e dos axentes cando estean dispoñibles.

Ademais, a solución tecnolóxica tamén permitirá introducir melloras técnicas nas canles de comunicación coas que xa conta o ORAL na actualidade, con medidas coma a introdución dun sistema de xestión das colas de espera que permitirá axilizar a distribución das chamadas telefónicas para que a cidadanía reciba unha atención máis especializada. Así mesmo, a solución ofrecerá datos en tempo real relativos ao número de chamadas en cola, os tempos de espera, o estado das e dos axentes e un histórico de liñas activas, chamadas rematadas e chamadas en curso.