A Deputación de Pontevedra pecha o próximo xoves 9 de abril o prazo de solicitude das axudas para que as entidades sen fins de lucro da provincia poidan realizar actividades culturais durante o ano 2026. A convocatoria está dotada de 350.000 euros, o que supón un incremento de 50.000 euros respecto ao pasado ano, e as bases poden consultarse no Boletín Oficial da Provincia.

As axudas a actividades culturais da Deputación divídense en dúas liñas, a primeira delas dotada de 290.000 euros (fronte aos 250.000 euros de 2025) cos que se poderán financiar actividades para a posta en valor do patrimonio inmaterial da provincia, certames e actividades de posta en valor da pintura, escultura, arquitectura e banda deseñada, tamén festivais, mostras, encontros ou certames culturais, ou festivais/actividades relevantes de promoción da cultura e tradicións que se celebren fóra de Galicia. A segunda, dotada de 60.000 euros (fronte aos 50.000 € de 2025), está reservada á participación en festivais, certames ou concursos nacionais e internacionais, ou en intercambios culturais fóra de Galicia.

Cada entidade poderá recibir ata 2.500 euros, sempre e canto non se supere o 75% do orzamento total da actividade. A Deputación de Pontevedra promove e fomenta así a cultura galega nas súas múltiples e variadas expresións artísticas, subvencionando actividades culturais co fin de contribuír á promoción e protección do patrimonio, á dinamización cultural especialmente nas zonas menos poboadas, e á difusión das tradicións e as distintas manifestacións culturais da provincia e de Galicia. O ano pasado resultaron beneficiados máis de 200 colectivos.