O presidente da Deputación de Pontevedra, Luis López, xunto co vicepresidente Rafa Domínguez, recibiu este luns no seu despacho do Pazo provincial a deportista pontevedresa Lydia Pérez, que acaba de conseguir un fito histórico para o deporte nacional. A loitadora pontevedresa conseguiu na cidade exipcia de Alexandría a primeira medalla de ouro do deporte español nunha final dos mundiais de loita praia, un logro que sumado a outro primeiro posto conseguido en Grecia noutra proba das series mundiais valeulle á loitadora do club Loita Pontevedra o subcampionato mundial desta disciplina.

O mandatario provincial, que recibiu a Lydia Pérez xunto con Pablo García, adestrador do club Loita Pontevedra; e o presidente da Federación Galega de Loita, Lose Luis Olazábal; recoñeceu o labor da deportista pontevedresa para consolidar a Pontevedra como a provincia do deporte.