Os campamentos da Lanzada da Deputación de Pontevedra reunirán na súa décima e penúltima quenda a partir deste domingo 23 de agosto no Grove un total de 140 nenos e nenas de 30 concellos da provincia. Ao longo de seis días, ata o sábado 29, os cativos poderán desfrutar do seu tempo de lecer a través de actividades de carácter educativo, cultural, deportivo e formativo. Neste verán e ata o 5 de setembro, serán en total máis de 1.500 menores empadroados nalgúns dos concellos da provincia os que participen nas once quendas en que se dividen os campamentos.

Os rapaces que chegarán esta semana ás instalacións da Deputación proceden dos concellos de Agolada (1), Baiona (2), Barro (1), Bueu (1), Cambados (1), Catoira (2), Cerdedo Cotobade (1), Cuntis (6), Gondomar (1), A Guarda (5), Marín (1), Meaño (2), Moaña (1), As Neves (2), Nigrán (7), Ponte Caldelas (1), Ponteareas (2), Pontecesures (2), Pontevedra (17), O Porriño (2), Redondela (2), Rodeiro (1), Salvaterra de Miño (1), Sanxenxo (1), Soutomaior (1), Tomiño (3), Vigo (67), Vilagarcía de Arousa (3) e Vilanova de Arousa (2).

No Centro de Vacacións da Lanzada, emprazado en San Vicente do Mar (O Grove), a cativada poderá desfrutar dun completo programa de actividades nas que salientan as deportivas, que terán lugar tanto no campamento (deportes alternativos, tiro con arco, orientación, carreira de obstáculos) como na praia (bodyboard, snorkel ou xogos de praia). Tamén gozarán de actividades artísticas, culturais, científicas, en lingua inglesa, nocturnas, de coñecemento do medio, teatro e contacontos ou baile e realizarán excursións a lugares como a illa de Ons.