A Deputación de Pontevedra financiará integramente a actuación de mellora da iluminación pública da zona norte do centro urbano da cidade de Pontevedra. A institución tomou esta decisión na constitución da comisión de seguimento do convenio entre o organismo provincial e o Concello de Pontevedra, co que os 2,3 millóns do seu orzamento total serán agora achegados pola Deputación. Á comisión asistiron o vicepresidente provincial, Rafa Domínguez, e mais o concelleiro de Servizos Urbanos Básicos, Xaquín Moreda.

O encontro convocouse coa finalidade de abordar a necesidade de reaxustar o financiamento que a Deputación achega no marco deste convenio, que afecta o ámbito do Pino, A Parda, O Castañal, Valdecorvos ou San Amaro, entre outras zonas. Inicialmente estaba previsto que a Deputación achegase 1,6 millóns de euros e o Concello os 700.000 euros restantes, e o cambio no financiamento será incorporado a través dunha adenda ao convenio, mentres que o resto do contido permanece sen cambios. O goberno da Deputación reafirma con este aumento de crédito o seu compromiso co avance e a modernización da cidade de Pontevedra, así como coa mellora da calidade de vida da súa veciñanza.

O proxecto permitirá financiar a renovación das actuais luminarias por outras con tecnoloxía LED, tamén se mellorará o control do sistema coa renovación de 39 cadros de mando e se substituirá parte dos cables, executando tomas de terra e mellorando as columnas. A actuación conseguirá un aforro do 78% no consumo respecto ao actual, ademais de reducir as emisións de CO2 en máis de 650 toneladas ao ano.

A cidade de Pontevedra recibe no orzamento deste ano 2,5 millóns de euros para os convenios co Concello, aos que se suman os 210.000 € consignados para preparar a Bienal do 2027, 8 millóns para o Museo, 7 millóns de remanentes que se dedicarán ao proxecto de Santa Clara, 35.000 € para a redacción do proxecto do novo centro loxístico do Museo, 100.000 € para a final das series mundiais de tríatlon ou 300.000 € para a organización dos Premios Feroz, así como novos investimentos en Príncipe Felipe e novidades en materia deportiva.