A Deputación de Pontevedra ultima o prazo para que as entidades culturais sen fins de lucro da provincia poidan solicitar os recursos postos á súa disposición, un total de 150.000 euros, para a dinamización da lingua galega. O obxectivo desta liña de axudas é potenciar o uso do galego no ámbito socioeconómico e en todos os sectores de importancia con repercusión social, así como promover a mellora do seu prestixio. O próximo luns 16 de marzo remata o prazo para que presenten as súas solicitudes.

Esta liña de axudas vai dirixida a proxectos de fomento do uso do galego como certames literarios ou xornalísticos, proxectos audiovisuais, videoxogos ou bandas deseñadas; iniciativas de toponimia; actividades de fomento do emprego do galego no comercio e na industria; campañas para a dinamización, uso e prestixio da lingua galega; ou, entre outras, iniciativas de captación de neofalantes. Cada unha poderá recibir ata 4.000 euros, sempre que non excedan o 75% do orzamento da actividade.

Os recursos provinciais servirán para cubrir desde os gastos de alugueiro de infraestruturas e espazos para desenvolver as súas iniciativas, a contratación de servizos técnicos, a edición de publicacións, servizos de difusión ou o caché e gastos (desprazamentos, aloxamento e manutención) dos grupos, artistas e compañías que levan a cabo as actividades financiadas.