A Deputación de Pontevedra continúa a xira das food trucks que están a percorrer todo o territorio provincial para promocionar e poñer en valor as festas gastronómicas de interese turístico que se celebran na provincia. O Sabor das Rías Baixas estará dispoñible o venres 27, o sábado 28 e o domingo 29 de marzo no Concello da Guarda (na Praza Avelino Vicente de 11:30 a 14.30 e de 17:00 a 20:00 horas), o venres 27 e sábado 28 de marzo en Vilaboa (o venres no Porto de Santo Adrán e o sábado nas Salinas do Ulló, en horario de 12:00 a 15:00 e de 18:00 a 21:00 horas) e o domingo 29 no Concello de Soutomaior (na Carreira da Ostra do peirao de Arcade en horario de 12:00 a 15:00 e de 18:00 a 21:00 horas).

O Sabor das Rías Baixas conta cunha frota de tres vehículos que realizan tres rutas para percorrer o norte, o centro e o sur da provincia informando sobre a oferta das festas gastronómicas, promocionando e poñendo en valor a gastronomía pontevedresa, e promovendo unha xestión sostible dos recursos desde o punto de vista económico, ambiental e social. Ademais das degustacións inspiradas nos pratos típicos destes eventos, nas food trucks repártese material promocional onde se recollen as datas de celebración, os produtos gastronómicos de referencia cunha breve descrición, e mais o lugar exacto onde se celebra cada festa.

O Sabor das Rías Baixas é un paso adiante da Deputación para diversificar a oferta turística da provincia, co obxectivo de atraer turismo interno durante a temporada baixa, e para a descentralización das actividades levadas a cabo por Turismo Rías Baixas en todos os concellos. Este programa serve como ferramenta estratéxica para achegar ao público experiencias culinarias vinculadas á identidade cultural da provincia, para crear novas oportunidades de visita e consumo e tamén para favorecer a actividade económica local.

As festas promovidas son a Festa do Lacón con Grelos (Cuntis), a Festa do Caldo de Mourente (Pontevedra), a Festa Encontro-Degustación do Millo Corvo (Bueu), Festa da Ostra de Arcade (Soutomaior), a Festa do Requeixo e o Mel (A Neves), a Festa do Choco (Redondela), a Festa do Salmón (A Estrada), a Festa da Troita (Ponte Caldelas), a Festa do Galo de Curral (Vila de Cruces), a Festa da Langosta (A Guarda), a Festa da Vieira e Festa do Albariño (Cambados), a Feira do Viño do Rosal, a Festa do Carneiro ao Espeto (Moraña), a Romaría da Tortilla de Laro e a Festa da Empanada da Bandeira (Silleda), a Festa do Mexillón e o Berberecho (Vilanova de Arousa), a Festa-Feira do Xamón (A Cañiza), a Festa da Lamprea e a Festa da Lamprea Seca (Arbo), a Festa da Ameixa do Carril (Vilagarcía de Arousa), a Festa da Anguía e Mostra da Caña do País (Valga), a Festa do Viño do Condado do Tea (Salvaterra de Miño), a Festa do Marisco (O Grove) e a Feira do Cocido (Lalín).

Balance das primeiras semanas de O Sabor das Rías Baixas

Ata a data repartíronse preto de 24.000 tapas coas preparacións inspiradas nas festas gastronómicas de interese turístico que se celebran na provincia de Pontevedra. Desde que as food trucks comezaron a percorrer a provincia, a campaña O Sabor das Rías Baixas chegou xa aos concellos de Bueu, Caldas de Reis, Cangas, Catoira, Cuntis, Marín, Moaña, Ponte Caldelas, Pontecesures, O Porriño, Salceda de Caselas, Salvaterra do Miño, Tomiño, Tui e Valga.