Co fin de divulgar entre a infancia o papel fundamental das cantareiras para a lingua, a Deputación ofrécelles aos concellos da provincia unha actividade de contacontos que, de xeito ameno e participativo, percorrerá a biografía destas mulleres baixo o título Cantareiras, poesía popular nas Letras Galegas.

Nesta actividade, que desenvolve Polo Correo do Vento, alternarase a narración sobre as cantareiras homenaxeadas este ano coa creación dun debuxo mural en directo e coa interpretación de pezas que cantaban estas mulleres ou algunhas propias da localidade onde se desenvolva esta acción, que rematará cun obradoiro de debuxo no que, seguindo as indicacións do ilustrador, o público asistente debuxará unha caricatura dunha pandeireteira.