Un total de 162 persoas de 32 concellos da provincia desfrutarán a partir deste domingo do programa de termalismo da Deputación de Pontevedra +Benestar, con estadías no Talaso Hotel Louxo, na Illa da Toxa (O Grove), o Hotel Spa Norat Torre do Deza, en Lalín, e no Balneario de Mondariz, en Mondariz-Balneario. Durante cinco días, ata o venres 16, accederán aos seus servizos de termalismo e similares en réxime de pensión completa e con actividades de animación sociocultural para fomentar o envellecemento activo.

Esta semana visitará o Balneario de Mondariz un grupo de 77 persoas procedentes dos concellos de Caldas de Reis, Campo Lameiro, Cangas do Morrazo, Catoira, Cerdedo-Cotobade, A Guarda, Lalín, A Lama, Marín, Meis, Mos, Nigrán, Poio, Pontevedra, O Porriño, Redondela, Ribadumia, Sanxenxo, Soutomaior, Tui, Vilaboa e Vilanova de Arousa. Outras 44 persoas pasarán polo Talaso Hotel Louxo, na Illa da Toxa (O Grove), desde os concellos de Cangas do Morrazo, Cerdedo-Cotobade, A Estrada, Gondomar, Marín, Nigrán, Poio, Pontevedra, O Porriño, Redondela, Salceda de Caselas, Soutomaior, Vila de Cruces, Vilagarcía de Arousa e Vilanova de Arousa. Finalmente, un grupo de 41 persoas dos concellos de Baiona, Cambados, Cangas do Morrazo, Cerdedo-Cotobade, Covelo, O Grove, Mos, Ponte Caldelas, Pontevedra, O Porriño e Sanxenxo desfrutarán da estancia no Hotel Spa Norat Torre do Deza (Lalín).

No marco do programa de termalismo +Benestar preto de 2.200 persoas de máis de 55 anos de 60 concellos da provincia pasarán seis días e cinco noites en balnearios, talasos ou spas de Sanxenxo, Mondariz-Balneario, O Grove e Lalín. A Deputación de Pontevedra pretende con esta iniciativa facilitar aos veciños da provincia o acceso a actividades de ocio saudable e envellecemento activo en establecementos hostaleiros e, ao mesmo tempo, dinamizar a economía da provincia, impulsando a creación e o mantemento de postos de traballo no sector turístico durante os períodos de menor actividade.

O organismo provincial subvenciona as prazas de réxime xeral con 100 €, mentres que as de réxime especial están subvencionadas con 400 €. Ademais da estadía, o paquete de +Benestar comprende a pensión completa, o uso do spa, do balneario ou doutras instalacións de características similares un mínimo de dúas horas ao día, e tamén o traslado de ida e volta en autobús aos establecementos desde os concellos de Vigo ou Pontevedra.