A Deputación de Pontevedra mantén aberto ata o próximo xoves 5 de marzo o prazo para que entidades de iniciativa social da provincia soliciten a liña de axudas para adquirir ou adaptar vehículos vinculados ao desenvolvemento da súa actividade. Unha liña de axudas dotada con 500.000 euros e que se convocou por vez primeira este ano co obxectivo de promover a mellora de servizos, actividades e iniciativas no ámbito social e para darlles cobertura ás necesidades das persoas que se atopan en situación de vulnerabilidade.

Este medio millón de euros repartirase en axudas de 25.000 euros para a adquisición de vehículos novos, 15.000 euros para mercar vehículos de segunda man e 5.000 euros para a realización de traballos de adaptación. En calquera caso, o importe máximo da subvención non poderá exceder o 80 % do orzamento.

O uso do vehículo será complementario aos servizos prestados polas entidades, e os servizos ou programas destas deberán ter un carácter estable. A adquisición do vehículo poderá supoñer a implantación ou ampliación do servizo de transporte, de persoas usuarias da entidade ou de alimentos, roupa, mobiliario ou mercancías para repartir entre familias e persoas en situación ou risco de exclusión social, así como para substituír un vehículo deteriorado, alugado ou un servizo subcontratado.