A Deputación de Pontevedra leva este sábado 27 de decembro o circuíto +Escénicas ao concello de Oia da man dun espectáculo familiar de pompas de xabón a cargo da compañía de teatro Malasombra. Trátase dunha actuación enmarcada na segunda edición desta iniciativa provincial, que apoia a programación de teatro e danza nos concellos de menos de 20.000 habitantes da provincia cun orzamento de 195.000 euros, 45.000 euros máis que na súa primeira convocatoria.

O espectáculo "Os fabulosos cleaners" de Malasombra representarase no Centro Cultural de Mougás a partir das 17:00 horas e está pensado para todos os públicos. Trátase dunha experiencia visual con pompas de xabón, creada por Luis Beviá e Xoque Carbajal, dirixida por Marcos Orsi e Xoque Carbajal e interpretada por Xoque e Jouse García. Esta proposta conta como dous operarios da limpeza do teatro descobren por casualidade as múltiples posibilidades que lles ofrecen as súas ferramentas de traballo combinadas con auga e xabón. Os personaxes emprenderán así unha excitante viaxe conducidos polas fantásticas burbullas: pompas transparentes, con fume, con vapor, pequenas, grandes, estáticas ou voando polo escenario.

Co circuíto +Escénicas, a Deputación dá resposta a unha demanda que o sector profesional vén facendo desde fai máis de 15 anos. Tralo éxito da primeira edición, entre abril deste ano e marzo de 2026 representaranse un total de 136 funcións, escollidas entre un catálogo de espectáculos dispoñible no sitio web da Deputación de Pontevedra, en 50 concellos da provincia de Pontevedra.