A Deputación de Pontevedra acaba de aprobar unha achega por valor de 30.000 euros para financiar integramente a reconstrución do lavadoiro da Aldea Labrega da Armenteira, en Meis. Trátanse de recursos do Plan +Provincia que destina ao concello preto dun millón de euros ao sumar os 600.000 deste ano e o adianto de 400.000 euros da liña de investimentos do 2027.

Con estes recursos financiarase a totalidade das obras necesarias para reconstruír o lavadoiro tradicional que está situado no conxunto da Aldea Labrega, que foi destruído polos temporais. O lavadoiro formaba parte do conxunto interpretativo da vida rural tradicional galega, polo que a súa ausencia provoca unha grave perda na lectura global deste espazo museístico ao aire libre.

A Aldea Labrega de Meis constitúe un dos principais puntos de interese turístico e cultural do concello, situado na coñecida Ruta da Pedra e da Auga e na Variante Espiritual do Camiño de Santiago. Deste xeito, a través da reconstrución do lavadoiro tradicional, que financiará integramente a Deputación de Pontevedra, manterase a coherencia do conxunto museístico, conservarase o valor cultural e turístico do espazo e manterase a experiencia dos visitantes e peregrinos.