A Deputación de Pontevedra leva este martes 8 de xullo a xeira de contacontos ‘Cantareiras, poesía popular nas Letras Galegas’, organizada en colaboración coa compañía Polo Correo do Vento co gallo das Letras Galegas, aos concellos de Portas e Vilagarcía de Arousa. A cita terá lugar este martes ás 10:00 horas na praia fluvial do río Umia en Portas e ás 12:00 no CEIP A Lomba de Vilagarcía, e continuará ao longo dos próximos meses ata completar as 35 citas programadas ao longo de todo o territorio provincial.

A Deputación ofrece de balde aos concellos da provincia esta actividade co fin de divulgar entre a infancia o papel fundamental das cantareiras para a conservación e difusión da lingua galega. Nela percorrerase a biografía destas mulleres (personificadas nalgunhas figuras como as de Adolfina e Rosa Casás Rama, de Cerceda, Eva Castiñeira Santos, de Muxía, e Manuela Lema e mais Prudencia e Asunción Garrido Ameixenda, integrantes das Pandeireteiras de Mens, de Malpica) dun xeito ameno e participativo. Tamén interpretarán as pezas que cantaban estas mulleres, ademais de pezas propias de cada unha das localidades onde se desenvolvan as accións, e os contacontos rematarán cun obradoiro de debuxo no que os nenos e nenas terán que realizar unha caricatura dunha pandeireteira.

Despois destes obradoiros en Portas e Vilagarcía de Arousa, a actividade tamén chegará en xullo ao Porriño, Gondomar, O Grove, O Rosal, Oia, Cuntis, Pontecesures, Pazos de Borbén, Mondariz, Cambados, Meaño, Ribadumia, Moraña, A Lama, Ponte Caldelas, Cangas do Morrazo e Soutomaior.