O presidente da Deputación de Pontevedra, Luis López, resalta o impulso cultural e turístico para a provincia que supón a celebración no Concello de Vilanova de Arousa do “Festivalle”, o Festival de Teatro Valle-Inclán. “As Rias Baixas están de moda, todo o mundo quere vir e non só pola gastronomía, as praias, a beleza natural ou o clima. Veñen por eventos como o que se vai celebrar aquí, un festival de teatro que é de primeira”, afirmou o mandatario provincial na presentación deste festival que tivo lugar na Casa Museo do Cuadrante, en Vilanova de Arousa.

O festival, que celebra este ano a súa terceira edición, celebrarase entre os días 8 e 11 de xullo e o programa inclúe a representación de catro das máis destacadas obras do dramaturgo nacido en Vilanova de Arousa a cargo de compañías teatrais chegadas desde Sevilla, Valladolid e Madrid; así como visitas guiadas polo concello, un curso académico con conferencias e unha instalación artística. “Seguimos traballando para que nos vindeiros anos Festivalle sexa un referente cultural a nivel español”, declarou o deputado provincial e tenente de alcalde de Vilanova de Arousa, Javier Tourís, quen destacou que se trata do primeiro ano que a Deputación colabora na organización deste festival.

Organizado pola Asociación de Amigos de Valle-Inclán e coa colaboración de institucións como a Xunta, o Concello e a Deputación de Pontevedra, o Festivalle “é máis ca un festival de teatro”, sinalou López. “Servirá para seguir exaltando a figura de Valle Inclan e vai servir para que o noso destino turístico sexa descuberto por xente que chega doutros puntos da xeografía de España, algo que é moi importante porque que ven ás Rías Baixas, unha vez que proba repite”, salientou o mandatario provincial poñendo o foco no impulso que se lle pode dar ao turismo a través da cultura.

A colaboración da Deputación coa organización deste festival ten unha dobre vertente. Por un lado, a asociación organizadora conta cun apoio económico de 10.000 euros para colaborar na elaboración do programa e, por outro, o organismo provincial colabora en materia de turismo cunha achega de 7.000 euros para a contratación de persoal para a oficina de turismo Valle-Inclán deste Concello. Unha colaboración que casa coa carácter municipalista da Deputación, que busca levar “eventos de calado e prestixio” como este festival a todos os recunchos da provincia.

Despois de recoñecer e agradecer o traballo que están a realizar tanto a Asociación de Amigos de Valle-Inclán como o alcalde de Vilanova de Arousa, Gonzalo Durán, e o deputado Javier Tourís pola promoción turística do Concello a través da cultura; Luis López reafirma o compromiso da Deputación de seguir colaborando con eventos coma Festivalle e convida a todo o mundo a achegarse a vindeira semana a Vilanova de Arousa.